METRO MANILA – Nagbanta si Pangulong Rodrigo Duterte sa kaniyang mga kritiko na itutuloy ang kaniyang pagtakbo sa pagka-bise presidente sa 2022 national elections.
Ginawa ng punong ehekutibo ang pahayag nang pangunahan ang national assembly ng PDP-Laban sa Clark, Pampanga noong Sabado (July 17).
“They keep on threatening me with lawsuits and everything, Trillanes and itong si Carpio and his elk, eh panay ang takot sa akin na mademanda ako. Sabi ng batas na kung presidente ka, bise presidente ka, may immunity ka, eh ‘di tatakbo na lang ako ng bise presidente. And after that tatakbo uli ako ng bise presidente at bise presidente.” ani Pangulong Rodrigo Duterte.
Pinatutungkulan ng punong ehekutio ang mga reklamo kaugnay sa anti-drug war ng kaniyang administrasyon.
Matatandaang inudyukan ng dating chief prosecutor ng International Criminal Court (ICC)na si Fatou Bensouda ang ICC na magbukas ng malawakang imbestigasyon sa anti-drug campaign ng gobyerno ng Pilipinas dahil nakakita umano ito ng rasonableng batayan na may crime against humanity of murder sa war on drugs ng Duterte administration.
Subalit, ayon kay Pangulong Duterte, hihingi siya ng tulong sa Korte Suprema sa usapin ng due process kung uusad ang mga reklamo sa ICC laban sa kaniya.
“You know I’m a lawyer, they can never acquire jurisdiction over my person, not in a million years. I can always go to the supreme court and say, I was deprived of due process.” ani Pangulong Rodrigo Duterte.
Samantala, sinabi naman ni Former Supreme Court Spokesperson Theodore Te na ayon sa konstitusyon at tradisyon, hindi immune ang bise presidente sa kaso.
Ganito rin ang pananaw ni Prof. Mel sta. Maria, ang dean ng Far Eastern University Institute of Law.
Inihalimbawa pa nito si Vice Presidente Leni Robredo na naharap sa kasong sedition, cyber-libel at iba pa.
(Rosalie Coz | UNTV News)
METRO MANILA, Philippines – Kapwa dismayado sina Vice President Leni Robredo at Dating Senador Ferdinand Marcos sa ika-4 na pagpapaliban ng Presidential Electoral Tribunal (PET) na paglabas ng merito sa election protest ni Marcos.
Si Marcos naiinip na sa tagal ng takbo ng kaso pero naniniwala syang paborable parin sa kanya ang magiging desisyon nito.
“Of course its frustrating pero what are you going to do, you have to trust the wisdom of our justices.” ani Ferdinand “Bongbong” Marcos.
Samantala ayon naman sa Pangalawang Pangulo nalulungkot sya dahil hindi pa rin dinismiss ng Korte Suprema ang petisyon ni Marcos pero positibo naman umano ang kanyang pagtanggap sa desisyon ng SC na isapubliko ang resulta ng recout sa 3 pilot provinces sa Negros Oriental, Iloilo, And Camarines Sur.
“Pero frustrated na hindi pa din na-dismiss. Siguro
half relieved. Relieved because isasapubliko iyong committee report.“ ani Vice
President Leni Robredo.
(Grace
Casin | UNTV News)
Tags: Vice President Leni Robredo, vice presidential elections
METRO MANILA, Philippines – Nagpakita muli ng pwersa ang mga tagasuporta ni dating Senator Ferdinand Bong Bong Marcos at Vice President Leni Robredo Kahapon (October 15) sa harap ng Korte Suprema.
Inaasahan kasi kahapon ang paglalabas ng desisyon ng Supreme Court (SC) na nagsisilbing Presidential Electoral Tribunal (PET) sa preliminary recount report ng member-in-charge na si Justice Benjamin Caguioa sa 3 probinsya, ang Iloilo, Negros Occidental at Camarines Sur.
Ngunit ang tinalakay sa En Banc session ng SC ay ang tungkol sa paglalabas ng resulta sa initial recount sa nasabing 3 pilot provinces. Sa botong 11-2 ay pinayagan ng tribunal ang paglalabas ng ulat sa revision at recount sa 3 probinsya.
“The tribunal has decided to release to the parties the report on the revision and appreciation of ballots in the three provinces, and for them to comment thereon”ani Supreme Court Spokesperon Attorney Brian Keith Hosaka..
Sina Justices Antonio Carpio at Caguioa ay nag-dissent o sumalangat sa naturang resolusyon. Inatasan din ng PET ang 2 kampo na ibigay ang kanilang posisyon, mga puna o pagtutol hinggil sa iba’ibang isyu sa preliminary report sa recount.
Samantala, sa ika-4 na pagkakataon ay ipinagpaliban ang botohan sa tinatawag na Caguioa Report ukol sa naging resulta ng initial recount. Sa botohang ito malalaman kung uusad pa o tuluyan nang idi-dismiss ang protesta ni Marcos sa pagkapanalo ni VP Robredo dahil sa alegasyon ng dayaan at anomalya sa nakaraang 2016 Vice Presidentail Elections.
(Nel Maribojoc | UNTV News)
May matibay umanong ebidensiya ang kampo ni dating Sen. Bongbong Marcos na nagkaroon ng dayaan sa nakaraang 2016 vice presidential elections.
Iprinesenta ni Marcos ang imahe ng mga balota mula sa Camarines Sur at Negros Oriental na kakaiba umano sa mga balotang ginamit noong halalan.
Wala ang mga oval na dapat sana ay katabi ng pangalan ng kandidato at sa halip, may makikitang square sa tabi ng ibang pangalan. May mga nakita ring balota na hindi binilang ang kanyang boto.
Halimbawa, sa tatlong balotang ito, malinaw na pangalan niya ang minarkahan pero “undervote” o walang boto ang nakalagay sa resibo. May mga balota rin umano na dapat spoiled na dahil dalawa ang ibinotong bise-presidente, pero lahat ay binibilang pabor kay Vice President Leni Robredo.
Ayon sa ekspertong kinonsulta ni Marcos, malinaw na may anomalya sa imahe ng mga balota. Kailangan umano na tingnan ang mga pisikal na balota upang matukoy kung ano ang pinagmulan nito.
Duda ni Marcos, posibleng ginawa ang aniya’y pagmanipula sa mga boto sa mga regional hub na itinalaga ng COMELEC anim na araw bago ang halalan.
Sa mga regional hub na ito ni-reformat ang mga pumalpak na sd card sa halip na dalhin pa sa warehouse ng COMELEC sa Sta. Rosa, Laguna.
Hinamon pa ni Marcos ang kampo ni Robredo na bawiin na nilang pareho ang kani-kaniyang mga mosyon at dumeretso na sa mano-manong bilangan ng mga balota.
Sa kabila nito, tiwala ang abogado ni Robredo na walang mapatutunayan ang protesta ni Marcos, kahit pa daanin sa mano-manong bilangan.
Posible namang matuloy na ngayong Pebrero ang manu-manong bilangan ng mga balota sa tatlong probinsiya para sa pilot recount, ang Camarines Sur, Iloilo at Negros Oriental.
( Roderic Mendoza / UNTV Correspondent )
Tags: dating Sen. Marcos, Robredo, vice presidential elections
