Nagtungo sa burol ng yumaong Bataan Vice Governor Elect Enrique “Tet” Garcia Jr. si President-elect Rodrigo Duterte kahapon ng hapon.
Mag aala-singko nang hapon ito dumating sa tahanan ni Garcia.
Pagdating ni Duterte ay nagkaroon muna sila ng pribadong pag-uusap kasama ang mga anak at asawa ni Tet Garcia na nagtagal ng halos labing limang minuto.
Pagkatapos nito ay nagtungo na ito sa mga labi ni Garcia kasama ang pamilya upang magbigay galang.
Nagbigay din ng kaunting mensahe sa iba pang kaanak ng pumanaw na bise-gobernador si President Elect Duterte kung saan kasama sa mga binabanggit nito ang ilang plano para sa Pilipinas.
Nagtagal lamang ito ng halos sampung minuto at umalis patungo naman sa meeting nito kasama ang kanyang gabinete sa Maynila.
(Joshua Antonio/UNTV NEWS)
Tags: Bataan Vice Governor Elect Enrique “Tet” Garcia Jr, President-elect Duterte
Ipinahayag ni incoming Presidential Communications Secretary Martin Andanar na wala namang sinasabi si President Rodrigo Duterte na hindi niya haharapin ang mga tauhan ng media sa loob ng anim na taon niyang termino.
Dagdag pa ni Andanar, ang katunayan nito, matapos na magbigay ng statement sa Davao si President Duterte na hindi na ito magsasagawa ng press conferences, nakapanayam pa rin ito ng ibang media organizations sa Cebu.
Samantala, wala pang impormasyon si Andanar kung saan manunuluyan si President Duterte pagkatapos nitong manumpa bilang bagong halal na pangulo sa Hunyo a-trenta.
Limang daang panauhin lang din ang inaasahang dumalo sa inauguration ni President Duterte sa Rizal Ceremonial Hall sa Malacañang kabilang na ang kaniyang mga gabinete, mga mambabatas, piling mga kaibigan at opisyal ng pulis at militar.
Tinatayang 150 hanggang 190 personal na bisita naman ang imbitado ni President Duterte upang saksihan ang kaniyang panunumpa bilang ika-16 na pangulo ng bansa.
Ang inaugurals ang hudyat sa paglilipat ng kapangyarihan ng kasalukuyang pangulo sa hahaliling president-elect.
Hindi naman makakapasok ang private media organizations sa Rizal hall at tanging government radio at tv stations ang makakapag-cover sa event dahil sa maliit na espasyo ng lugar.
Ganun pa man, makakapagmonitor pa rin naman ang mga mamamahayag sa new executive building sa Malakanyang sa pamamagitan din ng Radio TV Malacañang at PTV 4.
(Rosalie Coz / UNTV Correspondent)
Nararapat lamang na maalis na sa hanay ng pambansang pulis ang mga miyembrong nasangkot sa ipinagbabawal na gamot at ibang ilegal na aktibidad sa bansa.
Ayon kay PNP PIO Chief PCSupt. Wilben Mayor, tulad ng sinabi ni President-elect Rodrigo Duterte, walang puwang sa kanilang hanay ang mga pulis na sangkot sa mga ilegal na gawain.
Sinabi ni Mayor na patuloy ang paglilinis sa kanilang hanay at sa katunayan ay mayroon na silang mga nakasuhan dahil sa pagsuway sa sinumpaang tungkulin.
Tinitiniyak naman ni Mayor na dumadaan sa due process ang mga inirereklamong pulis.
Welcome naman rin sa PNP kung nais ni President-elect Rodrigo Duterte na ang Armed Forces of the Philippines ang maglinis sa hanay ng PNP.
Kaya naman panawagan ng pnp sa mga pulis na gumagawa nang ilegal, magbago na bago pa man umupo ang Duterte administration.
(Lea Ylagan / UNTV Correspondent)
Hindi nagi-endorso si President-elect Rodrigo Duterte ng pagpatay sa mga journalist.
Ito ang binigyang diin ni incoming Presidential Spokesman Salvador Panelo kasunod ng pagtuligsa ng ilan sa sinabi ni Duterte noong nakaraang briefing kaugnay ng isyu sa media killing.
Ayon kay Panelo, polisiya nga ng incoming president ang paglaban sa kriminalidad at laban sa illegal na droga na siyang dahilan kaya tumakbo sila bilang pangulo ng bansa.
Dagdag ni Panelo, suportado ni duterte ang pagbibigay ng proteksyon sa mga mamamahayag at sa karapatan nito na magbigay ng opinyon sa ibat ibang mga isyu.
Ayon naman sa Transition Team Spokesman Peter Lavina, dapat makita na ang naging pahayag ni Duterte ay magsilbing paalala o mensahe na may umiiral rin na korapsyon sa mass media kung saan ito ay nakita na anya ng incoming president sa nakaraang eleksyon sa ilang lumalabas na balita na binibigyang daan ang mga black propaganda.
(Nel Maribojoc / UNTV Correspondent)
Tags: isyu ng "media killings” remarks, President-elect Duterte
