Pinagpaplanuhan na ng Department of Education ang gagawing pagsasaayos ng mga paaralan sa Marawi City. Kasabay ito ng pagkakadeklarang ligtas na ang syudad mula sa mga terorista.
Sa tala ng DepEd, mahigit 27, 000 ang mga estudyanteng nakatala sa limampu’t syam na paaralan sa Marawi City. Karamihan sa mga ito ay lumipat na sa mga paaralan sa iba’t-ibang kalapit syudad at lalawigan.
Ayon kay DepEd Secretary Leonor Briones, posibleng umabot sa bilyong piso ang kinakailangan upang maipaayos ang mga nasirang paaralan.
Nais ng kagawaran na magrequest sa national government ng dagdag na pondo para mailaan sa rehabilitasyon ng mga paaralan ngunit posibleng matagalan pa umano ito.
Kaya naman sa isang business forum sa Maynila kahapon, humingi ng tulong si Briones sa private sector para sa rehabilitasyon ng mga paaralan sa pamamagitan ng adopt-a-school program ng pamahalaan.
Ilang grupo naman mula sa pribadong sektor ang nangakong tutulong sa nasabing proyekto.
( Abi Sta. Inez / UNTV Correspondent )
Tags: Marawi City, paaralan, Rehabilitasyon
Hindi pa rin nawawalan ng pag-asa ang Department of Environment and Natural Resources (DENR) kung ang pag-uusapan ay ang paglilinis sa Manila Bay.
Ayon kay DENR Secretary Roy Cimatu, inatasan nito ang Manila Bay Coordinating Council para bumalangkas ng plano sa rehabilitasyon ng baybayin.
Aminado ang kalihim na hindi ito madaling maisakatuparan dahil na rin sa dami ng mga establisyimentong nakatayo sa palibot nito mula sa Metro Manila at mga karatig lalawigan gaya ng Bulacan at Cavite.
Ayon sa opisyal, nasa 300 libong pamilya na nakatira malapit sa Manila Bay ang dapat mai-relocate.
Sa Barangay Tangos sa Navotas, isa ang bahay ni Mang Joan sa nabigyan na ng notice para lumipat sa relocation site. Hinahampas ng alon ang bahay nito lalo na kung may sama ng panahon. Kapansin-pansin ang mga nagkalat na basura sa baybayin subalit ipinapadpad lamang aniya ito sa kanila.
Tila hindi naman alintana ng mga naliligo sa dagat ang panganib sa kalusugan na maaaring maidulot sa kanila ng maruming tubig.
Ayon sa DENR, dapat ay nasa 100 lamang ang coliform level ng tubig dito sa Manila Bay para mapaliguan ng mga tao.
Subalit noong 2016 batay sa pag-aaral, umabot ito sa mahigit 155m. Ito’y lubhang mapanganib ayon sa DENR sa kalusugan ng mga maliligo dito.
Umaasa ang DENR na sa pagtatapos ng 2019 ay may malaking pagbabago na sa kalidad ng tubig sa Manila Bay. Bukod sa kagawaran, may 15 pang ahensya ng gobyerno na magtutulong-tulong para maisagawa ang rehabilitasyon.
Ayon kay Cimatu, ipapasara nito ang mga istrukturang mapapatunayang lumabag sa mga batas kalikasan gaya ng pagtatapon ng hindi malinis na waste water na direkta sa dagat.
( Rey Pelayo / UNTV Correspondent )
Tags: DENR, manila bay, Rehabilitasyon
Nakitaan ng paglabag ng pamahalaan sa mga batas pangkalikasan ang mga tourist area sa El Nido, Palawan.
Ang El Nido ay may 45 isla na isa sa mga magagandang tourist spot sa bansa.
Mismong si Department of Tourism (DOT) Secretary Bernadette Romulo-Puyat ang nakakita sa mga paglabag na ito ng ilang establisyemento. Over crowded na rin aniya ang lugar kaya’t kailangan limitahan na ang mga bumibisita doon.
Ayon sa lokal na pamahalaan ng El Nido, nasa 22 istruktura na ang kusang ipinagiba ng mga may-ari habang may kinukumpirma pa silang 50 na nakitaan din ng paglabag.
Katulad sa Boracay, ilan sa mga paglabag ay ang pagtatayo ng istruktura malapit sa dagat na lampas sa ipinahihintulot na distansya at ang hindi maayos na pagtatapon ng waste materials.
Ayon kay DENR Secretary Roy Cimatu, target nilang maging environmental compliant ang buong Palawan subalit uunahin muna nila ang Coron at El Nido.
Sa ngayon aniya ay ang mga establisyemento na lumalabag sa batas ang kanilang ipapasara at hindi ang buong tourist area.
Ayon naman kay DILG Secretary Eduardo Año, hindi naman kasing lala ng nangyari sa Boracay ang kalagayan ngayon ng El Nido.
Bubuo aniya sila ng rekomendasyon sa Pangulo subalit maaaring hindi na kailangang isara ang El Nido gaya ng ginawa sa Boracay.
Ayon pa kay Secretary Cimatu, sana ay maging halimbawa ang kanilang mga inaayos na lugar para na rin sa iba pang tourist area sa bansa.
( Rey Pelayo / UNTV Correspondent )
Tags: DOT, Palawan, Rehabilitasyon
Mas nakikita na ngayon ng marami sa mga mamamayan ng Marawi City na muling maibalik sa dati ang kanilang pamumuhay. Ito ay matapos ang groundbreaking cermony para sa pagsisimula ng rehabilitasyon ng ground zero ng Marawi City na isinagawa sa Barangay Dansalan kahapon.
Ayon sa ilang residente, nakahanda silang maghintay ng ilan pang panahon bastat masilayan ang tuluyang pagbangon ng Marawi.
Pinangunahan ang groundbreaking ni Task Force Bangon Marawi Chairperson Sec. Eduardo del Rosario.
Aniya, posibleng abutin ng tatlong taon ang rehabilitasyon dahil ang debri clearing operation pa lamang aniya ay aabutin na ng isa’t kalahing taon.
Ayon sa kalihim, walang dapat ipag-alala ang mga residente dahil mas napatubi na Marawi City ang kanilang masisilayan pagkatapos nito, kagaya ng nais ni Pangulong Rodrigo Duterte.
Samantala sa isang statement, ipinaliwanag ni Presidential Spokesperson at Legal Counsel Salvador Panelo kung bakit hindi nakarating si Pangulong Duterte sa groundbreaking.
Ayon sa kalihim, bagaman nais ng Pangulo na saksihan ang aniya’y makasaysayang okasyon, may dinaluhan ito na isa ring mahalagang pagtitipon.
Ipinahayag nito ang pagbati ng Pangulo sa Task Force Bangon Marawi dahil sa pagbuo ng komprehensibong rehabilitasyon ang recovery program sa tulong ng mga Muslim leader.
Nasa walumpung bilyong piso ang halaga ng pondo sa rehabilitasyon ng Marawi.
Labing-anim hanggang 17 bilyong piso dito ay tinatayang magagamit sa pagsasaayos ng ground zero.
( Weng Fernandez / UNTV Correspondent )
