Taliwas sa naunang pahayag ng Philippine National Police, kinumpirma ni Department of the Interior and Local Government Secretary Mike Sueño ang mga intelligence report na kanilang natanggap tungkol sa umano’y planong pambobomba sa Metro Manila.

Ayon sa kalihim, bago pa ang pambobomba na nangyari sa Davao City natanggap na nila ang intelligence report na planong panggugulo ng mga terorista.

Ito rin ang una nang kumalat sa social media at text massages kaugnay ng mga babaeng galing umano sa Basilan na planong bombahin ang mga mall sa Metro Manila.

Dahil dito pina-activate na ng DILG ang lahat ng kanilang intelligence group upang kumuha ng kumpletong impormasyon patungkol dito.

Panawagan naman ng Armed Forces of the Philippines na huwag nang ikalat pa sa text o social media ang mga ganitong banta at sa halip ay agad ireport sa kinauukulan.

Ayon pa sa AFP, hindi na bago ang kumakalat na balita na may magsasagawa ng pagpapasabog sa mga mall.

Ayon sa DILG hindi naman dapat mangamba ang publiko dahil nakabantay ang militar at pulisya sa bansa para protektahan ang taumbayan.

(Grace Casin/UNTV Radio)

Tags: Department of the Interior and Local Government Secretary Mike Sueño, intelligence report