Nais ni Sen.Jinggoy Estrada na makadalo sa selebrasyon ng ika-walumput apat na kaarawan ng kanyang ina na si Dr. Loi Ejercito sa Hunyo.
Sa mosyon ni Estrada, humihiling nito sa Sandiganbayan 5th division na payagan siyang makalabas ng Philippine National Police Custodial Center mula alas otso ng gabi hanggang alas dose ng madaling araw sa June 4.
Ayon sa senador, nais niyang makasama ang pamilya sa thanksgiving dinner at misa sa mandaluyong sa araw na iyon.
Noong nakaraang taon, hindi pinayagan ng korte si Estrada na maka-attend ng birthday celebration ng kanyang ina.
Nakikiusap din ang senador sa prosekusyon na huwag nang tutulan ang kanyang hiling at unawian na lang ang pagnanais niyang makasama ang kanyang pamilya.
Sa ngayon, wala pang desisyon ang Sandiganbayan sa mosyon ni Estrada.
Maliban sa birthday furlough, hiniling rin ng senador sa korte na makadalo sa huling mga sesyon ng senado mula June 6 hanggang 8.
Pinabago ito ng senador mula sa orihinal na hiling na May 30 hanggang June 2.
Pagaaralan rin ng korte kung may merito ang mga hiling ng senador bago ito pagbigyan.
(Joyce Balancio / UNTV Correspondent)
