Humarap sa pagdinig ng Kamara ang mga gang leader sa New Bilibid Prison upang tumestigo sa pagpapatuloy ng imbestigasyon sa umano’y talamak na bentahan ng droga doon.

Ang mga ito ay sina Noel Martinez ng Genuine Ilocano Gang, Jaime Patcho ng Batman Gang, at Froilan Trestiza ng Batang City Jail kasama ang dalawa pang high profile inmate na si Jojo Baligad at Hans Anton Tan.

Iisa ang kanilang kwento – tinotokahan sila ni Jaybee Sebastian na magbenta ng droga para umano sa senatorial campaign ni dating Justice Sec. Leila de Lima.

Gayunman, walang makapagsabi sa kanila kung nakakarating talaga ang pera sa dating kalihim.

Idinawit din ng mga testigo si dating BuCor Director Franklin Bucayu na anila’y nangongolekta rin ng pera mula sa mga high profile inmate.

Isang colonel Ely umano na tauhan ni Bucayu ang nakikipag-usap sa kanila.

Dati namang sinabi ni De Lima na gawa-gawa lamang ang mga ebidensiya sa kanya at nais lamang ng mga high profile inmate na makaganti sa kanya.

Ngunit ayon sa ilang kongresista, kapani-paniwala ang sinasabi ng mga testigo ng DOJ.

(Roderic Mendoza / UNTV Correspondent)

Tags: Sen. Leila de Lima at dating BuCor Director Franklin Bucayu