Gustong ibalik sa mano-manong eleksyon ni Presidential Adviser on Political Affairs Francis Tolentino ang gagawing eleksyon sa 2019.

Ayon sa kalihim, dapat aniyang makita ng mga botante kung talagang nabilang ang kanilang mga boto. Tinawag itong hybrid elections dahil gagamit parin aniya ng automation kapag iipunin na ang kabuoang bilang ng mga boto.

Ang hybrid elections ay una nang isinulong ni dating Comelec Commissioner Gus Lagman. Marami na aniyang mga bansa ngayon ang bumabalik na rin sa mano-mano.

Pero ayon kay Comelec Spokesperson James Jimenez, binigyan na nila ng pagkakataon si Lagman para sa hybrid elections sa pamamagitan ng isang mock election.

Babalik lamang aniya uli sa dating problema na kung saan posibleng makasingit ang dayaan kapag mas mabagal ang bilangan.

Subalit maaari pa rin naman aniyang muling subukan ng mga nagsusulong ng hybrid elections na ipresenta ito at kumbinsihin ang Comelec Advisory Council.

( Rey Pelayo / UNTV Correspondent )

Tags: COMELEC, election sa 2019, hybrid