Muling nagbukas ng Loan Restructuring Program ang Social Security System (SSS) sa lahat ng mga miyembro na may short term loan o utang na hindi na nababayaran ng anim na buwan pataas.
Principal loan at interes nalang ang kailangang bayaran ng miyembro at hindi na sila sisingilin pa ng SSS ng buwanang penalty. Maaari itong bayaran ng hanggang 5 taon.
Binaba na rin sa 3% ang interes mula sa normal interest rate na 10%. Maaaring mag-apply nito ang mga SSS member na may edad na animnaput limang taon pababa na may loan at nakatira o nagtatrabaho sa mga lugar na naapektuhan ng kalamidad.
Lahat ng gustong mag-avail ng loan restructuring program ng Social Security Program ay pinapayuhang magtungo sa lahat ng SSS branches sa buong bansa magsisimula silang tumanggap aplikasyon sa darating na ika-2 ng Abril na tatagal hanggang ika-1 ng Oktubre 2018.
Samantala, hindi na maaaring mag-apply pa ang mga sumali na sa naunang loan restructuring program ng SSS.
( Grace Casin / UNTV Correspondent )
Tags: Loan Restructuring Program, penalty, SSS
METRO MANILA – Inihahanda na ng Social Security System (SSS) ang Calamity Loan Assistance Program na maaring i-avail ng mga Overseas Filipino Workers (OFWs) na naapektuhan ng malakas na lindol sa Taiwan.
Ito ay para sa mga OFW na pawang mga miyembro ng SSS.
Ayon kay SSS President and CEO Rolando Macasaet, ito ang unang pagkakataon na kanilang ie-extend ang loan program para sa mga Filipino worker na biktima ng kalamidad sa ibang bansa.
Paliwanag ng SSS ang calamity loan ay kanila lamang ino-offer para sa mga miyembro na apektado ng kalamidad sa Pilipinas.
Sa datos ng SSS, mayroong nasa 10,000 OFWs na active members ang nagta-trabaho sa Taiwan.
Tags: Calamity Loan, SSS, Taiwan OFWs
METRO MANILA – Ibibigay na ng Social Security System (SSS) sa darating na December 1 at December 4 ang 13th month pay ng mga pensyonado depende sa contingency dates ng pensioner.
Katumbas ito ng isang buwang pensyon.
Ayon sa SSS, aabot sa nasa 3 milyong mga pensyonado ang mabibigayan ng 13th month pay kabilang na ang retirement, disability at survivorship.
Bukod sa SSS, ipagkakaloob na rin ang cash gift sa mga retiradong kawani ng gobyerno na ibibigay sa unang Linggo ng Disyembre.
Katumbas naman ito ng nasa P10,000 o 1 buwang pensyon.
Nauna nang inianunsyo ng Department of Budget and Management (DBM) na matatanggap na simula kahapon (Nov. 15) ng mga kawani ng gobyerno ang year-end bonus na katumbas ng 1 buwang sweldo ng mangagawa.
Gayundin ang P5,000 cash gift para sa mga empleyadong kwalipikado na tumanggap nito.
Tags: 13th month pay, SSS
METRO MANILA – Tinaasan ng Social Security System (SSS) ang maximum amount ng funeral benefits sa P60,000 bilang insentibo sa mga aktibong miyembro.
Ayon sa SSS, sinimulan ang pagpapatupad sa enhanced guidelines sa SSS funeral burial benefit program nitong October 20, 2023.
Sa bagong patakaran, ang claimants ng pumanaw na miyembro ng SSS na may 36 months contribution o higit pa ay maaaring makatanggap ng P20,000 hanggang P60,000 na SSS funeral benefits.
Ang mga miyembro naman na nakapaghulog lang ng 1 buwan o hindi umabot sa 36 monthly contributions sa pahahon ng pagpanaw ay makatatanggap ng P12,000 fixed funeral benefits.
Ilan sa sakop ng enhanced funeral benefit ang embalming services, burial transfer services, funeral services at cremation o interment services.
Tags: Funeral Benefit, SSS
