Sa susunod na buwan ay muling magsasama-sama ang malalaking pangalan sa Music Industry para sa ikatlong Wish Music Awards.
Bago pa man ang awards night ay buhos na ang suporta ng WISHers sa kanilang mga pambatong artist sa pamamagitan ng nationwide voting.
Saan mang lugar sa bansa ay dinadagsa ang WISH booth sa mga mall at pamantasan kung saan sila maaaring bumoto. Ongoing din ang online voting sa WISH Music Award Website at sa WISH App.
Maaaring bumoto ang isang account isang beses sa isang araw hanggang Jan. 15, alas dose ng tanghali.
Samantala, grateful naman ang mga OPM artist na makasama sa nominations ngayong taon. Gamit ang social media ay ipinahayag ng mga ito ang pasasalamat sa istasyon at ang excitement sa nalalapit na awarding.
Noong nakaraang taon, kabilang sa big winners sina Morisette, Jason Dy at Darren Espanto. Ang ikatlong Wish Music Awards ay isasagawa sa Jan.15 sa Smart Araneta Coliseum.
( Leslie Longboen / UNTV Correspondent )
