Nanindigan ang Office of the Ombudsman sa utos nito na suspendihin sa loob ng isang taon si Camarines Norte Gov. Egdar Tallado dahil sa oppression at grave abuse of authority.
Kaugnay ito ng hindi pagsunod ni Tallado sa utos ng Civil Service Commission na ibalik sa pwesto ang tinanggal niya na provincial veterinarian na si Edgardo Gonzales.
Matapos ilabas ng Ombudsman ang suspension order noong Dec.1, umapela pa ang kampo ni Tallado at sinabing hindi siya nabigyan ng due process.
Sa ilalim din aniya ng condonation doctrine, hindi na siya maaaring makasuhan o maireklamo sa dating offenses kapag narelect siya o naibalik sa pwesto ng publiko.
Ngunit ayon sa Ombudsman, ang hindi pagsunod ni Tallado sa utos ng CSC ay umabot pa hanggang sa maluklok muli ito sa pwesto.
Hindi rin aniya nakapagprisinta ng ebidensya ang kampo ng akusado para bawiin ng anti graft court ang nauna nitong desisyon.
Maalalang noong 2012, nang tanggalin sa pwesto ni Tallado si Gonzales dahil aniya sa hindi pagpasok nito sa trabaho sa loob ng mahigit isang buwan.
Pero nanindigan ang Ombudsman na isa itong opresyon at pagabuso sa kapangyarihan ni Tallado dahil napatunayan ng Civil Service Commission sa pamamagitan ng biometrics log in at log out ni Gonzales na hindi naman ito lumiban sa trabaho.
Maliban kay Gonzales, pinatawan din ng suspension without pay sa loob ng anim na buwan ang supervising administrator na si Mario Dela Cruz habang multa na katumbas ng anim na sweldo ang ipinataw sa resigned provincial legal officer na si Sim Mata.
(Joyce Balancio/UNTV Correspondent)
Tags: Camarines Norte Gov. Edgar Tallado, Ombudsman, Suspensyon
Isang preventive suspension ang ipinatupad ng Department of the Interior and Local Government (DILG) laban kay Malay Municipal Mayor Ceciron Cawaling matapos pirmahan ng Office of the Ombudsman ang resolusyon kaugnay sa mga reklamong isinampa ng DILG laban sa alkalde at iba pang opisyal sa Aklan.
Ayon kay DILG Secretary Eduardo Año, ika-23 ng Oktubre nang lagdaan ng Office of the Ombudsman ang resolusyon sa preventive suspension ni Cawaling habang Miyerkules naman nang matanggap ito ng DILG.
Hunyo nitong taon nang magsampa ng kasong kriminal at administratibo ang DILG sa Ombudsman laban sa 17 opisyal ng probinsya ng Aklan at bayan ng Malay.
Kaugnay ito ng umano’y anomalya sa pagpapatupad ng environmental laws sa isla at sa hindi maayos na paggamit ng environmental fee na kinokolekta sa mga turistang pumapasok sa Boracay.
Sa labing pitong opisyal, tanging si Mayor Cawaling pa lamang ang mapatawan ng preventive suspension sa ngayon.
Dahil sa pagkakasuspinde kay Mayor Cawaling, si Vice Mayor Abraham Sualog na muna ang uupo bilang acting mayor ng bayan ng Malay batay sa mga panuntunan ng DILG.
Sa kabila ng biglaang pagbabago, sinabi naman ng DILG na susuportahan nila ang mga current officials ng Malay, Aklan sa pagpapatupad ng mga panuntunan para sa ikauunlad ng kalikasan ng Boracay at para sa Tourism sustainability nito.
Samantala, nagsagawa naman ng capability demonstration exercises ang Metro Boracay Police Task Force sa white beach sa Boracay kahapon.
Sari-saring scenarios o eksena katulad ng mass drowning, oil spill, terrorism at bombing incident ang nakapaloob sa exercise.
Ayon sa PNP, bagaman walang natatanggap na anomang banta sa isla, mabuti na anila na maging handa lalo na ngayong inaasahan ang muling pagdagsa ng mga turista sa isla.
( Vincent Arboleda / UNTV Correspondent )
25% ng mga brand ng pangunahing bilihin na minomonitor ng Department of Trade and Industry (DTI) ang nagtaas na ng presyo.
At upang hindi mahirapan ang mga mamimili, pinakiki-usapan ngayon ng DTI ang nalalabing 75% na kung maaari ay huwag nang sumunod sa price increase hanggang matapos ang taon.
Ayon sa ahensya, ilan sa mga ito gaya ng manufacturer ng sardinas, canned meat at mga sabong panlaba ang tumugon na sa kanilang panawagan.
Samantala, hinihintay pa ng DTI ang sagot ng mga kumpanyang gumagawa ng gatas, kape at noodles.
Bunsod nito, nakatakda ring i-update ng DTI ang listahan ng kanilang expanded SRP. Tinitiyak ng DTI na sisikapin nilang mapanataling stable ang presyo ng mga pangunahing bilihin.
Gayunman, kailangan ring tutukan ang pagtaas ng presyo ng mga agricultural products gaya ng bigas, gulay, isda, manok at baboy.
Plano naman ng isang consumer group na ihabla sa Ombudsman ang mga opisyal ng DTI dahil sa hindi pagsunod ng mga ito sa kanilang mandato.
Ayon sa Laban Konsyumer group, nilalabag ng DTI ang public service at good governance na isa sa kanilang mga pangunahing katungkulan.
Si Vic Dimagiba ang unang nagmungkahi na magpatupad ng moratorium ang DTI sa dagdag presyo. Nais ng grupo nito na siyam na buwang walang dagdag presyo sa mga pangunahing bilihin.
Sinabi rin ni Dimagiba na walang political will ang DTI upang bantayan na mapapababa ang presyo ng mga pangunahing bilihin.
Nanindigan naman ang mga economic managers ng Pangulong Duterte na ang mga pagtaas sa presyo ng mga bilihin ay hanggang sa katapusan lamang ng taon at magiging stable na ito sa susunod na taon.
( Mon Jocson / UNTV Correspondent )
Magpapatuloy ang paglilitis ng mga kasong plunder at katiwalian ni dating Senador Jinggoy Estrada kaugnay ng pagkakasangkot nito sa pork barrel scam.
Sa botong 6-4, pinagtibay ng Korte Suprema ang resolusyon ng Office of the Ombudsman na nagsasabing may sapat na batayan upang litisin sa Sandiganbayan ang dating senador.
Tumanggi muna ang kampo ni Estrada na magbigay ng pahayag hinggil sa isyu dahil hindi pa umano nila natatanggap ang kopya ng resolusyon.
Matatandaang Abril noong 2014 umapela sa Korte Suprema si Estrada at hiniling na baliktarin ang resolusyon ng Ombudsman.
Nanindigan ito na biktima siya ng selective justice at political persecution bilang dating miyembro ng opposition sa panahon ng Aquino administration.
Batay sa kasong isinampa ng Ombudsman, tumanggap si Estrada ng 183 milyong piso na kickback mula sa kanyang Priority Development Assistance Fund (PDAF).
Setyembre 2017 pinayagan naman ng Sandiganbayan na magpiyansa ang dating senador dahil mahina umano ang ebidensiya laban dito.
Bukod kay Estrada, kinasuhan din ng Ombudsman sina dating Senador Juan Ponce Enrile at Ramon Bong Revilla Jr.
( Mai Bermudez / UNTV Correspondent )
Tags: Korte Suprema, Ombudsman, PDAF scam
