Tinapyas na pondo sa mga ahensya ng pamahalaan, ibabalik na

by Radyo La Verdad | August 16, 2018 (Thursday) | 903

Ibabalik na sa mga ahensya ng pamahalaan ang mga pondong binawas sa kanila sa para sa panukalang budget para sa susunod na taon.

Ito ang isa sa mga napagkasunduan sa pakikipagpulong nina House majority leader Rolando Andaya Jr. kay Pangulong Rodrigo Duterte kahapon matapos tutulan ng Kamara ang cash based budgeting system at itigil ng budget briefing.

Ayon kay Andaya, hindi itataas ang budget kaya posibelng magkaroon nalang ng realignment sa 2019 budget para maibalik ang mayorya ng budget cut.

Ayon sa minorya, dapat lang na ibalik ang mga pondong binawas sa mga ahensya dahil nang ipasa ang TRAIN law ay nangako ang pamahalaan ng mas maraming infrustructure at social services.

Sinabi pa ni Andaya na posibleng magkaroon ng supplemental budget para pondohan ang naisabatas na bangsamoto organic law at ang desisyon ng korte suprema sa deficiency sa internal revenue allotment.

Hybrid cash based budgeting system na rin ang kanilang gagamitin kung saan maaari nang gamitin ang pondo ng hanggang isa’t kalahating taon.

Nilinaw ng majority leader na hindi na dapat pang pag-usapan ang reenacted budget dahil mismong ang Pangulo ay hindi sangayon dito at tiniyak niyang maipapasa ang 2019 proposed budget sa tamang panahon.

Susuportahan naman ng karamihan ng mga senador ang cash based budgeting system ng administrasyon upang maiwasan ang reenacted budget.

Hinala ni Senator Lacson, tutol ang mga kongresista sa cash based budgeting dahil liliit ang mailalaang pondo para sa kanilang mga distrito.

Nanawagan na rin si Lacson sa Malakanyang na manghimasok na sa isyu ng pagpapasa ng panukalang budget.

 

( Grace Casin / UNTV Correspondent )