(Photo credit: odditycentral.com)

Isang kakaibang pattern ng krimen ang nangyayari sa Kensington, Philadelphia sa nakalipas na dalawang linggo.

Imbes na manloob sa mga bahay upang magnakaw ng mga gamit, ninanakaw ng mga suspek ang house numbers na nakakabit sa facade ng mga bahay sa naturang lugar tuwing dis-oras ng gabi.

Ang kapansin-pansin dito, tanging ang mga numerong 1 at 0 lang ang ninanakaw ng mga suspek.

Kaugnay nito, nahuli sa surveillance camera sa magkaibang petsa ang isang babae na hinila ang number 0 sa nakakabit na house number ng isang bahay sa lugar, samantalang isang lalake naman ang kumuha ng dalawang number 1 mula sa isa pang bahay.

Dahil sa 1 at 0 lang ang ninanakaw ng mga suspek ay tinawag ang mga ito na “binary bandits”.

Wala namang nakakaalam kung bakit ginagawa ito ng mga suspek nguni’t may hinuha ang ilang residente na gagamitin ang mga ninakaw sa isang art installation o kaya’y may gustong ipahiwatig na mensahe ang mga ito.

Tags: mga bahay sa Philadelphia, ninanakaw ang house numbers na nakalagay sa facade, Umano'y "binary bandits"