Nanonood lamang ng tv sa mess hall ang mga inmate sa Bldg 14 ng maximum security compound ng New Bilibid Prisons nang biglang saksakin ang grupo nina Jaybee Sebastian.

Ayon sa abugado ni sebastian na si Atty. Eduardo Arriba, taliwas ito sa sinasabi ng BuCor officials na nahuling nagdo-droga ang mga high profile inmate at sinubukang sawayin ng ibang inmate.

Batay naman sa pagsusuri ng mga doktor sa Muntinlupa Medical Center, kapwa may mga saksak ng ice pick malapit sa puso at ibat ibang bahagi ng katawan sina Jaybee, Peter at Tony Co na siyang nagtamo ng pinakamalalang tama.

Hindi naman kailangan pang ilipat ng ibang ospital ang mga ito dahil stable na ang kanilang kondisyon at kailangan na lamang ng limang araw para sa recovery period.

Apela naman ni Atty. Arriba, bagamat stable na ang lagay ng kanyang kliyente ay hiniling nila na ilipat ito sa Asian hospital.

Mahigpit ngayon ang ipinatutupad na seguridad sa paligid ng Muntinlupa Medical Center kung saan nagdeploy na ng maraming Special Action Force na magbabantay sa mga naka-confine na inmate.

(Lea Ylagan / UNTV Correspondent)

Tags: abugado ni Jaybee Sebastian, Umano’y pot session sa loob ng selda