Mabilis na tinupok ng apoy ang Bowling Area at Alumni Hostel sa loob ng campus ng University of the Philippines sa Diliman, Quezon City bandang alas-onse y medya kagabi.
Umabot sa ikalawang alarma ang sunog na pinagtulungang apulahin ng rumespondeng UNTV Fire Brigade at iba pang Quezon City Fire Volunteers.
Ayon sa caretaker ng gusali, may narinig siyang pagsabog matapos makita ang isang lalaki na pumasok sa kanilang kuwarto. ilang sandali pa’y may napansin na silang usok kaya dali-dali silang humingi ng saklolo sa naka-duty na security guard.
Sa inisyal na imbestigasyon ng Bureau of Fire Protection, nagsimula ang sunog sa unang palapag ng gusali at posibleng problema sa linya ng kuryente ang sanhi nito
Tinatayang aabot sa halos dalawandaang libong piso ang halaga ng naabong ari-arian.
Nasa higit limampung estudyante ang apektado ng sunog; isa fire volunteer ang nasugatan matapos maka-apak ng pako sa kanang paa habang wala namang napaulat na nasawi.
Naideklarang fire out ang insidente makalipas ang isang oras.
Sa ngayon ay patuloy nang iniimbestigahan ng bfp ang pangyayari.
Mahigit isang oras nadelay ang ikalawang PiliPinas debates 2016 sa University of the Philippines o UP Cebu.
Ito’y dahil sa umano’y kagustuhan ni Vice President Jejomar Binay na magdala ng mga ‘kodigo’ o mga dokumento sa stage, dahil mahalaga raw ito sa kanyang pakikipagdebate.
Kinumpirma naman ni Luchi Cruz Valdez, TV5 anchor at ang moderator ng PiliPinas debates, pinayagan niya na magdala ng notes o kodigo si Binay.
Gayunman, binawi ito at ipinaliwanag ni Valdez na uninformed daw siya o hindi niya alam ang Comelec rules hinggil sa pagdadala ng notes.
Umani naman ng iba’t ibang reaksyon mula sa mga netizen ang pagkakaantala ng debate.
(UNTV NEWS)
Naging valedictorian ang isa sa mga student-beneficiaries ng Pantawid Pamilyang Pilipino Program o 4P’s ng Department of Social Welfare and Development.
Galing sa isang maralitang pamilya, hindi ito naging hadlang kay Shaira Perez, 16 taong gulang, para makamit niya ang pinakamataas na karangalan nang magtapos ito ng high school sa Laiya National High School sa Bgy. Laiya, San Juan, Batangas.
Pinangunahan niya ang nasa 287 mag-aaral na nagsipagtapos ngayong taong 2015 sa naturang paaralan.
Isa lamang si Shaira sa mahigit 9,000 high school graduates na beneficiaries ng 4P’s sa probinsya.
Aminado ang ina Shaira na si Rowena Perez na tila hindi nila kakayanin na pag-aralin pa ng college si Shaira subalit buo ang loob ang bata na makapag-aral ng kolehiyo sa kabila ng kanilang abang kalagayan.
Dagdag pa ni Shaira, hindi kailanman magiging hadlang ang kahirapan ng buhay upang gumuho ang kaniyang pangarap na magkaroon ng magandang kinabukasan.
Target ni Shaira na makapag-aral ng accounting o engineering sa University of the Philippines.(Joms Malulan/UNTV Radio)
Tags: 4Ps, DSWD, Pantawid Pamilyang Pilipino program, Shaira Lopez, University of the Philippines, valedictorian
