Naglabas na ng ikalawang lookout bulletin ang Department of Justice sa iba pang miyembro at opisyal ng Aegis Juris Fratartenity na posibleng may kinalaman sa pagkamatay ni Horacio Castillo III. Kasama dito ang Dean ng University of Sto. Tomas College of Civil Law Dean Nilo Divina.
Idinagdag din dito ang pangalan ng mga miyembro ng Aegis Juris na nakuhannan ng CCTV footage sa Novotel at ang mga kasama sa kanilang fb chat group.
Ayon kay Justice Sec. Vitaliano Aguirre, ginawa nila ito hindi para pigilan silang umalis ng bansa. Gayunman, kailangan aniyang kumuha ng permit ang mga ito sa DOJ bago bumiyahe sa ibang lugar.
Nananawagan din ang kalihim sa mga kabilang sa mga nasa look out order na lumapit sa DOJ at makipagtulungan upang malinis ang kanilang mga pangalan.
Naninindigan naman si UST Civil Law Dean Nilo Divina na wala siyang kinalaman o partisipasyon sa pagkamatay ni Atio.
Handa rin aniya siyang tumugon sa kautusan ng DOJ at wala siyang planong pagtakpan ang sinuman.
Kumpiyansa rin itong malilinis ang kaniyang pangalan dahil siya ay makikipagtulunan sa mga otoridad
( Aiko Miguel / UNTV Correspondent )
Sampung buwan na ang nakakalilipas, ngunit sariwa pa rin sa alala ng mga magulang ni Atio Castillo III ang malagim na sinapit ng kanilang anak. Si Atio ang UST law student na napatay sa hazing ng mga miyembro ng Aegis Juris Fraternity.
Bagaman nakapiit na ang mga suspek, balot pa rin ng lungkot at panghihinayang ang mga magulang nito. Kasabay anila ng pagkamatay ni Atio ay gumuho ang kanilang pangarap para sa minamahal na anak.
At upang hindi na maulit pa sa iba ang masakit na sinapit ni Atio, nilagdaan na ni Pangulong Rodrigo Duterte ang inamyendahan at mas pinalakas na bersyon ng anti-hazing law.
Sa ilalim ng Republic Act 11053 o ang Anti-Hazing Act of 2018, mahigpit nang ipinagbabawal ang anumang uri ng hazing sa mga fraternity, sorority, o anumang uri school organization. Gayundin sa mga opisina at mga uniformed service learning institution.
Bukod dito, maaari na ring maparusahan ang mga opisyal ng eskwelahan ng dalawampung taon hanggang habang-buhay na pagkakakulong kung mapatutunayang nagpabaya ang mga ito upang mangyari ang hazing.
Ang sino namang nagplano o nakiisa sa hazing activities na nagresulta sa pagkamatay, rape at injury sa isang tao ay papatawan ng reclusion perpetua at multang tatlong milyong piso.
Sa ilalim ng bagong bersyon ng batas, kasama na ring maparurusahan ang sinumang magtatangkang pagtakpan o itago ang nangyaring karahasan.
Nakasaad din sa pinaigting na batas na maari na rin ikonsiderang liable ang sinumang kasama sa nagplano kahit wala sa mismong hazing.
Sa pananaw ng ina ni Atio, walang masama sa pagsali sa fraternity, subalit hindi na aniya kinakailangan pa ang hazing upang patunayan lamang ang katapatan ng isang bagong miyembro na sasali sa grupo.
( Joan Nano / UNTV Correspondent )
Tags: Atio, hazing, Pangulong Duterte
Sa isang statement na inilabas sa official publication ng University of Sto. Tomas na “The Varsitarian”, kinumpirma ng pamunuan ng UST na ini-expel na sa paaralan ang walong law students na mayroong koneksyon sa pagkamatay ni Horacio “Atio” Castillo.
Ayon sa pahayag, napatunayan umano ng komite na nag-imbestiga sa pagkasawi ni “Atio” na lumabag ang walo sa Code of Conduct and Discipline. Ang komite ay binubuo ng anim na school administrators at isang myembro ng Central Student Council.
Tiniyak ng mga ito na nagkaroon ng due process sa imbestigasyon at magpapatuloy ito hanggang sa mapanagot ang lahat ng sangkot sa pagkamatay ni “Atio”. Hindi naman pinangalanan ng paaralan kung sino-sino ang mga estudyanteng na-expel. Ikinatuwa naman ng pamilya ni Atio ang nangyari.
Ayon kay Ginang Castillo, inaasahang magtuloy-tuloy na ang pagsulong sa pagkamit ng katarungan sa pagkamatay ng kaniyang anak at marami pang katanungan ang dapat na sagutin ng mga pangalang nadawit sa kaso ng kanilang anak gaya ni UST Law Dean Nilo Divina at ng faculty secretary nito na si Arthur Capili at isang Irvin Fabella.
Plano umano ng mga magulang ni Castillo na dalhin ang kaso sa Vatican pagkababa ng resolusyon mula sa Department of Justice.
Posible namang mahaharap disbarment si Divina at ilan pa dahil sa umano’y cover-up sa kaso ng hazing ni Castillo.
( Asher Cadapan Jr. / UNTV Correspondent )
Tags: Atio, law students, UST
Limitado lamang ang detalye na ibinigay ng Aegis Juris Fraternity member turned state witness na si Marc Ventura sa muling pagpapatuloy ng pagdinig ng senado sa kaso ng hazing victim na si Horacio “Atio” Castillo III.
Ayon sa mga senador, ito ay upang hindi makaapekto sa kaso. Kabilang sa isinalaysay ni Ventura ang mga huling sandali ni “Atio” sa initiation rites noong September 17.
Aniya, apat ang halinhinang pumapalo kay Atio bago ito nawalan ng malay. Nagawa pa anila itong i-upo at kausapin matapos bumagsak ngunit hindi na ito nagrerespond. Kwento pa ni Ventura, tumagal ng nasa tatlumpung minuto bago dalhin sa ospital si Atio.
Nagpahayag naman ng pagkadismaya sina Senators Juan Miguel Zubiri at Grace Poe kay John Paul Solano na una nang inaasahang magbibigay ng konkretong detalye sa krimen. Dahil ito sa tila pagninisi ni Solano sa sakit sa puso ni Atio kaya ito nasawi.
Gayunman, taliwas ito sa resulta ng final autopsy ng PNP kay Castillo. Muli namang umapela ang magulang ni Atio na tuluyan nang ipagbawal ang hazing.
Samantala, mananatili namang nakadetine sa senado ang itinuturong lider ng Aegis Juris na si Arvin Balag habang hinihintay ang resulta ng petisyon nito sa Korte Suprema.
( Asher Cadapan Jr. / UNTV Correspondent )
Tags: Aegis Juris Fraternity, Atio, Mark Ventura
