Iginiit ni Pangulong Aquino na walang naranasang maling pagtrato si Vice President Jejomar Binay sa loob ng limang taon na paninilbihan nito bilang miyembro ng gabinete.
Ito ang naging tugon ng Pangulo matapos aniyang suklian ng pambabatikos sa kaniyang administrasyon ang ipinakita niyang maganda kay VP Binay.
Sinabi rin ni Pangulong Aquino na hindi niya aniya tinuring na spare tire ang ikalawang pangulo. Katunayan aniya, kahit ng hilingin nito ang pagiging presidential adviser para sa kapakanan ng mga overseas Filipino workers ay pinagbigyan niya ito.
Sinabi pa ng Pangulo na mula pa noong unang EDSA Revolution at panahon ni dating Pangulong Marcos ay magkasama na sila kaya naman ikinagulat ng Pangulo ang pasiya nitong pagbibitiw bilang miyembro ng gabinete.
Sa kabila nito, inatasan na ng Pangulo ang kaniyang gabinete na sagutin isa isa ang mga batikos ni VP Binay kung saan tinawag nitong manhid at palpak ang administrayong Aquino.(Jerico Albano/UNTV Radio)
