Sinampahan na kahapon ng kasong syndicated illegal recruitment, estafa at trafficking in person ang walong opisyal at staff ng East Trans Global Manpower Consultants Incorporated.
Ang mga ito ay naaresto ng Criminal Investigation and Detection Group-Anti-Transnational Crime Unit (CIDG-ATCU) sa isang operasyon noong Biyernes ng hapon sa isang bahay sa Pasay City.
Dito tila ikinulong ng mga suspek ng apat na buwan ang mahigit 200 aplikante na nais na magtrabaho sa Saudi Arabia.
Ayon sa ilang biktima, hindi sila basta-basta makalabas sa naturang bahay. Stay-in umano sila habang hinihintay ang pangakong pag-alis ng mga recruiter upang makapagtrabaho sa ibang bansa.
Ngunit ayon kay CIDG-ATCU Chief PSupt. Roque Merdegia Jr., base sa dokumentong nakuha nila sa Philippine Overseas Employment Administration (POEA), suspendido na ang lisensya ng East Trans Global Manpower Consultants Inc., ngunit patuloy pa rin ang kanilang recruitment.
Hinihingan aniya ng hanggang 45 libong piso na processing fee ang mga biktima kapalit ng 23 libong piso na sweldo buwan-buwan bilang domestic helper sa Saudi.
Iniimbestigahan naman ng CIDG-ATCU ang pamemeke ng mga suspek sa edad ng mga aplikante dahil nakasaad sa ilang dokumentong nakuha nila na mayroong mga menor de edad sa mga ito
Nakapagtataka rin umano na lahat ng pasaporte ng aplikante sa inisyu ng Department of Foreign Affairs (DFA) Cotabato.
Muling paalala ng CIDG-ATCU, dumaan sa mga accredited recruitment agencies kung nais na makapagtrabaho sa ibang bansa upang makaiwas sa kapahamakan.
( Lea Ylagan / UNTV Correspondent )
Tags: CIDG, human trafficking, Makati
METRO MANILA – Suportado ni Bureau of Immigration (BI) Commissioner Jaime Morente ang isinasagawang imbestigasyon ni Senator Risa Hontiveros kasama ang komite ng Women, Children, Family Relations and Gender Equality hinggil sa pagkakadawit ng ilang kawani ng ahensya sa human trafficking.
Pahayag ni BI Commissioner Morente, hindi kukundinahin nila ang mga tiwaling kawani at papatawan ng nararapat na kaparusahan ang sinomang mapatunayang sangkot sa trafficking schemes.
Kaugnay nito, nasa 86 immigration officers na hinihinalang sangkot sa nasabing ilegal na aktibidad ang sinuspinde ng ahensiya batay sa isinagawang imbestigasyon ng Senate committee, DOJ, NBI at office of the Ombudsman.
Dagdag pa ng Commisioner,patuloy ang isinasagawa nilang internal checking sa mga
opisyales at manggagawa ng ahensiya upang masigurado ang kaligtasan ng ating mga kababayan sa ganitong klase ng krimen.
Batay sa ulat ng BI sa nakalipas na 2 taon (2019-2020), humigit sa 50,000 na mga Pilipino ang pinigilan sa pag-alis ng bansa kung saan ilan sa mga dahilan nito ay mga illegal recruitment at human trafficking.
(Kyle Nowel Ballad | La Verdad Correspondent)
Tags: human trafficking
Sinalakay ng mga tauhan ng CIDG-Anti Transnational Crime Unit ang isang unit sa Qubix residences sa Pedro Gil St., Paco, Manila noong Miyerkules. Ito’y upang hulihin ang mag live-in partner na sina Eladio Cabrera at Melissa Cardona.
Ayon kay CIDG-ATCU Chief PSupt. Roque Merdegia Jr., ang dalawa ay inireklamo ng tatlong aplikante na pinangakuang makapagtatrabaho sa Dubai at Qatar.
Sinabi ng isa sa biktima na P30 libong piso ang hinihingi sa kanila kapalit ng affidavit ng sponsorship mula sa opisina ng umano’y consulate ng Pilipinas sa Dubai at Qatar.
Sa pakikipag-ugnayan sa Philippine Overseas Employment Administration (POEA), nalaman ng mga biktima na hindi otorisadong mag-recruit sa kahit anong bansa ang dalawang suspek.
Nakuha sa mga suspek ang mga computer at dry seal ng iba’t-ibang konsulada ng Pilipinas sa Middle East na ginagamit sa pamemeke ng mga dokumento.
Ang dalawang suspek ay kinasuhan na ng illegal recruitment, swindling at falsification of public document.
( Lea Ylagan / UNTV Correspondent )
Tags: CIDG, illegal recruitment, Maynila
MAKATI, Philippines – Bistado ang pamamaslang ng tatlong Chinese nationals sa isa nilang kababayan sa isang condominium sa Makati City bandang alas-6 kagabi.
Kinilala ang biktima sa pangalang Wang Yalei, 26-anyos. Habang tinukoy naman ng mga otoridad ang pangunahing suspek sa pagpatay na si Zhang Chuning, 22-anyos at tatlo pang Chinese-national.
Ayon kay NCRPO Police Director Guillermo Eleazar, natuklasan ng housekeeper sa basurahan ng condominium ang isang bag na naglalaman ng mga duguang gamit kabilang ang isang kutsilyo at ilang damit. Nang siyasatin ng security personnel ang CCTV footage sa gusali, nakita ang mga suspek na bitbit ang naturang bag.
Nang inspeksyunin ng mga gwardya ang condo unit ng mga suspek ay natagpuan sa banyo ang isang duguang maleta na naglalaman ng mga putol-putol na katawan ng biktima. Agad na rumesponde ang mga pulis upang arestuhin ang mga suspek.
Inaalam pa ng mga awtoridad ang dahilan ng karumaldumal na krimen. Samantala, nasa kustodiya na ng Southern Police District ang mga suspek na mahaharap sa kasong murder.
(Ulat at kuha ni Asher Cadapan Jr.)
