Dahil sa hindi sapat na supply ng tubig mula sa Metro Iloilo Water District, sisimulan na ngayong linggo ng lokal na pamahalaan ng syudad ang pagsasagawa ng water rationing.
Nasa 35,000 cubic meters ang normal water consumption kada araw ang mga demand ng tubig sa syudad ngunit mahigit 26,000 cubic meters lamang ang naisusupply sa ngayon dahil sa lumalalang epekto ng El Niño phenomenon.
Bumaba din ang daily production ng tatlong pinagkukunang watersheds at dalawang deep well ng MIWD.
Mula sa 29,000 cubic meters na production nito bawat araw bumagsak ito sa 19,000 cubic meters dahil sa nararanasang tagtuyot sa probinsya.
10,000 cubic meters na ibinaba sa produksyon ng tubig na katumbas naman ng 10,000 households na kumokonsumo ng one cubic meter kada araw na hindi masusuplayan ng tubig.
Kaya naman binigyan na ng prangkisa ng lokal na pamahalaan ang isang water supplier upang magsagawa ng water rationing sa mga lugar na hindi maabot sa serbisyo ng water district upang maibigay ang pangangailangan ng mga ito sa tubig.
Ngayong linggo sisimulan ng water supplier ang pagrarasyon sa 24 baranggay na walang tubig.
Noong nakaraang buwan ay isinailalim ang Iloilo City sa state of water calamity dahil sa problema sa supply ng tubig.
Tatlong milyong piso ang inilaang pondo ng lokal na pamahalaan upang masolusyunan ito.
(Lalaine Moreno / UNTV Correspondent)
METRO MANILA – Nagdesisyon ang Inter-Agency Task Force for the Management of Emerging Infectious Diseases na isailalim na rin sa Modified Enhanced Community Quarantine (MGCQ) ang Iloilo City simula May 23-May 31, 2021.
Kasunod ito ng apela ng lokal na pamahalaan dahil sa COVID-19 surge sa lungsod.
Samantala, mananatili din hanggang sa katapusan ng Mayo ang ipinatutupad na MECQ sa mga probinsya ng Apayao, Benguet at Cagayan.
Unang isinailalim sa MECQ ang 3 probinsya noong May 10 hanggang May 23, ngunit pinalawig pa ito dahil sa patuloy na pagtaas ng bilang ng naitatalang kaso ng COVID-19.
Bukod sa mga ito, nasa ilalim din ng MECQ hanggang May 31 ang Santiago City-Isabela, Quirino, Ifugao at Zamboanga City.
Habang nasa General Community Quarantine with heightened restrictions naman ang National Capital Region, Rizal, Laguna, Cavite, at Bulacan.
As of May 23, 2021, pumalo na sa 1.17 Million ang total Covid-19 cases sa bansa, 1.1 Million na ang gumaling samantalang higit na sa 19,900 ang nasawi sa sakit.
(Rosalie Coz | UNTV News)
Tags: Iloilo City, MECQ
Ang Baluarte Elemtary School sa Iloilo City ang pinakamalaking voting area sa buong lungsod. Mayroon itong 49 clustered precincts para sa 9 na barangay ng Molo District, Iloilo City.
Alas 5 ng umaga ay bukas na sa publiko ang gate ng eskwelahan ngunit nagsimula lamang na dumami ang mga tao bandang alas 7 na ng umaga.
Sa kasalukuyan ay maayos pa rin ang sitwasyon dito sa Baluarte Elementary School.
May iba na medyo nahirapan sa paghahanap ng kanilang voting precinct dahil sa dami ng sakop ng voting area na ito.
Ang Iloilo City ay may 274,789 voters para sa barangay election, habang 87,003 naman ang naka rehistro upang bomoto SK election.
Meron itong 840 clustered precincts at 62 voting centers sa buong lungsod.
Apat na barangay naman ang nailagay sa election hotspots dito sa Iloilo City kabilang na ang Barangay Seminary Burgos at Dungon B ng Jaro District, Barangay Taal sa Molo District at Barangay Quezon naman sa Arevalo District.
Umaasa naman ang Commission on Elections Officer Attorney Reinier Layson ng Iloilo City na magiging mataas ang voting turn-out ng lungsod katulad din nung mga nakaraang eleksyon.
( Vincent Arboleda / UNTV Correspondent )
Tags: COMELEC, Iloilo City, voting turn out
Naabutan ng UNTV News and Rescue Team sa Iloilo City Police Station 3 na umiiyak at iniinda ang mga sugat sa katawan si Annie Rose Silva.
Ayon kay Silva, ang mga sugat ay bunga ng pagka kakaladkad ng riding-in-tandem criminals na nang agaw sa kaniyang bag sa may 24a Luna street, Jaro, Iloilo City pasado alas onse kagabi.
Hindi binitiwan ng biktima ang bag kaya siya nakaladkad. Agad nilapatan ng pangunang lunas ng UNTV Rescue ang tinamong sugat ni Silva sa balikat, siko, kamay at paa. Tumanggi na itong magpadala sa ospital.
Patuloy namang pinaghahanap ng mga pulis ang mga suspek na tumangay sa kaniyang bag.
Samantala, walang malay at nakahandusay sa kalsada ng datnan ng Untv News and Rescue Team ang motorcycle rider na si Mark Anthony Omena.
Bumangga ang sinasakyang motorsiklo ni Omena sa barrier ng Mindanao Avenue underpass kaninang mag-aalas dos ng madaling araw. Nagtamo si Omena ng galos sa ulo, hiwa sa kaliwang binti at pagdurogo ng ilong at bibig.
Ayon sa pulis, posibleng lasing ang rider dahil nangangamoy alak ito. Matapos lapatan ng first aid ay agad dinala ng grupo sa Pacific Global Medical Center ang rider.
Nirespondehan din ng UNTV News and Rescue Team ang aksidente sa Mindanao Avenue, corner Tandang Sora street kaninang pasado ala una ng madaling araw.
Ayon sa mga nakasaksi sa aksidente, bumangga sa concrete barrier ang sasakyang minamaneho ni Kevin Gonzales matapos siyang masagi ng isang kulay berde na dumptruck.
Iniinda ni Gonzales ang pananakit ng kaliwang braso. Laking pasasalamat naman ng biktima dahil bumukas ang air bag ng kanyang sasakyan.
Nilapatan ng paunang lunas ng UNTV News and Rescue ang biktima pero tumanggi na itong magpadala sa ospital.
Sinubukang habulin ng mga pulis ang dump truck subalit hindi na ito naabutan.
( Lalaine Moreno / UNTV Correspondent )
