METRO MANILA, Philippines – Inaprubahan na ng Land Transportation Franchising and Regulatory Board (LTFRB) ang ₱2 dagdag pasahe sa mga pampasaherong jeep. Sa desisyon inilabas ng LTFRB, inaprubahan na ang ₱10 minimum na pasahe para sa unang apat na kilometro ng biyahe.
Sakop nito ang mga jeep na bumibiyahe sa Metro Manila, Central Luzon at Southern Tagalog region. Pero nilinaw ng transportation department at LTFRB na sa unang linggo pa ng Nobyembre sisimulan ang dagdag-pasahe.
Sa pahayag na inilabas ng DOTR at LTFRB, pinakiusapan ang mga jeepney driver na wala munang maninigil ng dagdag-pasahe dahil sa susunod na buwan pa ito magiging epektibo.
Ginawa ng ahensya ang pahayag matapos na lumabas ang kopya ng kautusan kaugnay ng dagdag pasahe ngunit hindi pa anila ito pinal o pirmado
September 2017 pa inihain ng mga transport group sa LTFRB ang kanilang petition for fare increase bunsod ng patuloy na pagtaas ng presyo ng langis. Ngunit noong Hulyo lamang ngayong 2018 nang aprubahan ng kagawaran ang ₱1 pansamantalang dagdag-pasahe sa PUJ kaya naging ₱9 ang minimum fare
At ngayong aprubado na ang panibagong ₱1 fare increase, magiging permanente na ang ₱10 pamasahe. Samantala hindi naman pinaboran ng LTFRB ang inihihirit na ₱1 dagdag singil sa kada susunod na kilometro ng biyahe ng jeep. Ito’y dahil sa kawalan umano ng sapat at matibay na batayan upang patunayan na makatwiran ang pagpapataw nito.
Tags: dagdag-pasahe, jeep, jeepney, jeepney driver, Land Transportation Franchising and Regulatory Board, LTFRB, sampung piso, ₱10
METRO MANILA – Pinaghahandaan na ng Land Transportation Franchising and Regulatory Board (LTFRB) ang gagawing pagpapatupad ng diskwento sa pasahe sa mga pampublikong sasakyan.
Batay sa rekomendasyon ng Department of Transportation (DOTr), ibabalik sa dating halaga ang pasahe bago magpandemya.
Mula sa kasalukuyang P12 na minimum fare sa mga tradisyunal na jeep, magiging P9 ito. Habang P11 naman sa mga modern jeep mula sa P14 na minimum fare.
Ayon sa LTFRB, posibleng umabot lang ng 6 na buwan ang service contracting program na may mahigit P2B pondo.
Umaasa ang LTFRB na madadagdagan pa ang pondo para umabot hanggang katapusan ng taon ang gagawing fare discount sa mga mananakay.
METRO MANILA – Nais ni Pangulong Ferdinand Marcos Junior na makasiguro na walang sinoman sa mga jeepney driver ang mawawalan ng kabuhayan sa implementasyon ng Public Utility Vehicle Modernization Program (PUVMP).
Aniya patuloy na pag-aaralan ng pamahalaan ang sistema kung papaano papalitan ang lumang mga PUV na hindi naman magiging pahirap sa tsuper at operator.
Aalamin din ng gobyerno ang problema sa pautang ng ilang transport groups para makabili ng modernong unit ng sasakyan.
Nauna nang nagpasalamat ang grupong Piston at Manibela na nabigyan sila ng pagkakataon na mapakinggan ang kanilang mga hinaing.
Ayon kay Mar Valbuena na Chairman ng Manibela, nagdesisyon silang ihinto na ang tigil pasada nitong Miyerkules, March 8 dahil nangako ang Office of the Executive Secretary at Presidential Communications Office (PCO) na pag-aaralan at bubusisiin ang implementasyon ng PUVMP.
Iginiit din aniya ni Executive Secretary Lucas Bersamin at PCO Secretary Cheloy Garafil na inutos na ni Pangulong Ferdinand Marcos Jr, na i-review ang modernization program hangang sa katapusan ng taon.
Sa isang opisyal na pahayag pinasalamatan din ng LTFRB ang mga transport group na inihinto na ang tigil-pasada at muling binigyang diin na bukas ang kanilang tanggapan para pag-usapan ng maayos kung papaano pa mapabubuti ang implementasyon ng PUV modernization program.
Tags: LTFRB, PBBM, PUV modernization program
METRO MANILA – Mula sa dating 758 na mga bus unit na bumibiyahe sa Edsa carousel, ginawa na lamang itong 550 units ngayong tapos na ang libreng sakay at holiday season.
Ayon kay LTFRB Technical Divison Head Joel Bolano, ito talaga ang orihinal na bilang ng mga bus unit na pinayagan na bumiyahe simula pa nang ilunsad ang Edsa busway.
Bukod dito ipinatigil na rin ang biyahe ng mga Point-to-Point (P2P) bus na una nang pinayagang bumiyahe sa Edsa busway sa pamamagitan ng special permit.
Bagaman binawasan na ang bilang nga mga bus na bibiyahe sa Edsa carousel, tiniyak ng LTFRB na may masasakyan pa rin ang mga pasahero anomang oras dahil mananatili pa ring 24/7 ang operasyon ng mga bus.
Bukod dito inaasahan rin ng ahensya na mababawasan na ang bilang ng mga commuter ngayong lumipas na ang holiday season.
Gayunman, patuloy pa ring oobserbahan ng LTFRB hanggang sa susunod na Linggo kung talagang sapat na ang bilang ng mga bus na nakadeploy sa busway o kailangan pa rin itong dagdagan.
Bagaman aminado ang ilang pasahero na mas mahal ang bayad sa Edsa busway, mas pinipili pa rin nila ang sumakay dito dahil mabilis anila ang biyahe.
Batay sa fare matrix nasa P15-P75 ang singil sa Edsa busway mula Monumento hanggang PITX.
Payo ng LTFRB na kung sakaling may mga bus na maniningil ng labis sa fare matrix, i-report agad sa kanilang tanggapan upang maaksyunan at mapatawan ng karampatang parusa ang sino mang lalabag dito.
(JP Nunez | UNTV News_)
Tags: Edsa bus carousel, LTFRB
