Nakaburol ngayon sa St. Peter Funeral sa Tacloban City ang mga labi ng anim na miyembro ng 805th Military Police Company ng Police Regional Mobile Force Batallion na mga biktima ng nangyaring engkwentro sa Samar kahapon.
Kinilala ang mga ito na sina PO1 Wyndell Noromor, PO1 Edwin Ebrado, PO1 Phil Rey Mendigo, PO1 Julius Suarez, PO1 Rowell Reyes at PO1 Julie Escalo.
Nasa Eastern Visayas Regional Medical Center naman ang mga sugatang pulis na sina PO1 Elmer Pan, PO1 Cris Angelo Pialago, PO1 Romulo Cordero, PO1 Joenel Gonzaga, PO1 Rey Barbosa, PO1 Roden Goden, PO1 Jaime Galoy, PO1 Romel Bagunas at PO1 Janmark Adones.
Sa inisyal na impormasyon mula sa Armed Forces of the Philippines (AFP), nagpapatrolya ang 805th Military Police Company pasado alas nuebe ng umaga kahapon sa bulubunduking bahagi ng Sta. Rita, Samar nang paulanan ng bala ng hindi nila kilalang grupo. Tumagal umano ng halos dalawampung minuto ang palitan ng putok sa pagitan ng mga ito.
Ngunit ang nakasagupa pala ng mga ito, ang 87th Infantry Batallion na anim na araw nang nag-ooperate sa nasabing lugar.
Sa isang statement nagpaabot ng pakikiramay sa pamilya ng mga nasawi si Major General Raul Farnacio, ang commander ng 8th Infantry Division. Sinabi nito na magsasagawa ang AFP at PNP ng joint investigation hingil sa nangyaring insidente.
Gagawin umano nila ang karampatang aksyon sa mga mapapatunayang nagpabaya sa tungkulin at titiyaking hindi na muling mangyayari ang ganitong insidente.
( Archyl Egano / UNTV Correspondent )
Tags: miscounter, patay, Samar
Nabulabog ang mga residente ng Sitio San Roque sa Barangay Bagong Pag-asa, Quezon City nang makarinig ng sunod-sunod na putok ng baril pasado alas onse kagabi.
Pinagbabaril ng hindi pa nakikilalang suspek ang tatlong magkakaanak habang magkakatabing natutulog ang mga ito sa loob ng kanilang bahay.
Kinilala ang mga ito na sina Romeo Ado Sr., ang asawa nitong si Christine Ado, at ang labing-isang taong gulang na anak na si Romeo Ado Jr.
Ayon sa mga otoridad, isang witness ang nakakita sa suspek na mag-isang naglakad papunta at paalis sa bahay ng mga biktima. Nagtanong pa umano ang suspek sa saksi bago mangyari ang krimen.
Ilang saglit pa ay hindi bababa sa walong putok ng baril ang narinig mula sa loob ng bahay pamilya Ado.
Nagtamo ang mga biktima ng mga tama ng baril sa ulo at iba pang bahagi ng katawan. Na-recover sa lugar ang mga basyo ng bala ng 9 mm pistol.
Suspetsa ng kaanak ng mga biktima, maaaring may kinalaman ang insidente sa iligal na droga. Bumuo na ng tracker team ang Quezon City Police District na tutugis sa suspek.
( Asher Cadapan Jr. / UNTV Correspondent )
Tags: patay, Quezon City, Suspek
Boluntaryong sumurender sa 2nd Eastern Samar Provincial Mobile Force Company ng Philippine National Police (PNP) si “Ka Nestor” at “Ka Joel”, kapwa miyembro ng New People’s Army (NPA).
Mahigit sa labinlimang taon nang kasapi ng samahan si Ka Nestor at kasalukuyang NPA commander na nag-ooperate sa Samar at Eastern Samar.
Habang si “Ka Joel”, halos sampung taong kasapi at kasalukuyang political instructor sa ilalim ng national command ng rebeldeng grupo.
Sumuko anila sila upang makasama ang kanilang pamilya. Hindi na rin nila kaya ang hirap at panganib na nararanasan sa kabundukan. Kasama sa isinuko ng mga ito ang kanilang mga armas at bala.
Ayon kay Police Chief Superintendent Dionardo Carlos, regional director ng PNP 8, ang pagbabalik-loob ng mga rebelde ay bunga ng localized peace talks at ng pinaigting na intelligence and information operation o counter propaganda ng pamahalaan upang masugpo ang mga rebelde nang hindi gumagamit ng dahas.
Sa ngayon ay pinoproseso na ang mga kaukulang dokumento upang maka-avail ang mga ito sa Enhanced Comprehensive Local Integration Program (ECLIP).
Sa ilalim nito, makakatanggap ng immediate assistance na 15,000 piso ang mga rebel returnees, livelihood assistance na 50,000 piso, PhilHealth assistance, skills development assistance, security assistance at firearm remuneration.
Paglilinaw naman ng PNP na hindi nila binibili ang mga armas na kasama sa pagsuko ng mga rebelde kundi ito umano ay karagdagang tulong para sa kanilang pagbabagong buhay.
( Archyl Egano / UNTV Correspondent )
Tatlo ang nasawi, samantalang tatlo naman ang sugatan sa pamamaril ng isang female shooter sa isang rite aid distribution center sa Aberdeen, Maryland USA. Patay din ang suspek matapos magbaril naman sa sarili.
Naganap ang pamamaril Huwebes ng umaga sa Amerika. Kinilala ang female shooter na si Snochia Mosely, 26 na taong gulang na mula sa Baltimore County.
Batay sa mga ulat, isa itong disgruntled employee. Namaril ito sa labas ng gusali ng rite aid at sa katabing warehouse.
Nasa isang libo ang empleyado ng naturang pasilidad ayon sa company spokesman na si Pete Strella.
Nangyari ang pamamaril ilang milya ang layo sa Aberdeen Proving Ground, isang malaking army facility kung saan binubuo at sinusubok ang military technology.
Agad namang rumesponde ang mga tauhan ng Bureau of Alcohol, Tobacco, Firearms and Explosives mula sa tanggapan ng Baltimore gayundin ang FBI.
Nangyari ang shooting isang araw matapos mamaril ang isang lalake kung saan nasugatan ang apat kabilang ang isang police officer sa Pennsylvania court building.
Napaslang naman ang suspek ng mga tauhan ng pulisya ayon sa Pennsylvania State Police.
Agad namang inalerto ng embahada ng Pilipinas ang mga miyembro ng Filipino community sa Maryland at pinaiwas sa lugar ng insidente.
Sa pinakahuling ulat ng Department of Foreign Affairs, walang Pilipino na nadamay sa nangyaring pamamaril.
Tags: Amerika, patay, shooting incident
