MANILA, Philippines – Makalipas lang ang ilang linggo ay balik-kulungan na naman ang dalawang lalaking hinihinalang nagbebenta ng shabu matapos mahuli sa magkahiwalay na buy-bust operation sa Pandacan, Maynila kagabi.
Kinilala ang pangunahing suspek na si Juan Miguel Bautista alyas Iggy at ang umano’y kasamahan nito na si Joseph Malicsi alyas Opet. Ayon sa mga pulis na nakatalaga sa lugar, unang nagsagawa ng buy-bust laban kay Bautisa sa kanto ng Nagtahan Street at Jesus Street sa Pandacan bandang alas-6 kagabi.
Nagtangka pang tumakas ang suspek sakay ng motorsiklo nito ngunit naabutan ito ng mga pulis matapos matumba ang sinakyan nitong motorsiklo sa area ng Galas, Quezon City. Nang isalilim sa tactical interrogation si Bautista ay itinuro nito ang kanyang kasamahan na kasalukuyang naka-check in sa isang motel sa Sampaloc, Maynila.
Kaagad na nagsagawa ng follow up operation ang mga awtoridad na humantong sa pagkakaaresto ni Malicsi kasama ng lima pang kasama nito sa bahay na hinihinalang mga nagpa-pot session sa lugar. Sa pagsisiyasat ng mga pulis, kamakailan lang ay nakulong na rin ang dalawang pangunahing suspek kaugnay ng iligal na droga ngunit pansamantalang nakalaya matapos magpiyansa.
Kasalukuyan nang nasa kustodiya ng Manila Police District ang mga drug suspect na mahaharap sa kasong paglabag sa Comprehensive Dangerous Drugs Act of 2002.
(Asher Cadapan Jr. / UNTV News)
Tags: buy bust, illegal drugs, joseph malicsi, juan miguel bautista, m, manila, Maynila, Pandacan, pusher, Sampaloc, shabu
METRO MANILA – Nasabat ng Bureau of Customs (BOC) katuwang ang PDEA at Inter-Agency Drug Interdiction Group NAIA, ang tangkang pag-eexport ng nasa 763 grams ng methamphetamine hydrochloride o shabu na nagkakahalaga ng mahigit 5.2 million pesos.
Binalot at isinilid sa mga kahon ng shuttle cock ang mga droga nang masamsam ito ng mga awtoridad sa kanilang isinagawang x-ray scanning at physical examination.
Ayon sa imbestigasyon, ang kargamentong naglalaman ng mga ilegal na droga ay patungo sana ng Bahrain, United Kingdom at Australia.
Agad namang nai-turn over kahapon (July 30) sa PDEA ang mga nasamsam na droga para sa profiling at paghahain ng reklamo.
Nahaharap naman sa RA 9165 o Comprehensive Dangerous Drug Act of 2002 at paglabag sa Section 1401 o (Unlawful Importation and Exportation) sa ilalim ng “Customs Modernization and Tariff Act of 2016” ang mga sangkot sa tangkang pag-eexport.
(Jasha Gamao | La Verdad Correspondent)
Tags: BOC, illegal drugs
Mananatili pa ring bukas ang lahat ng mga pampublikong transportasyon sa NCR plus habang nasa ilalim ito ng ECQ simula ngayong araw hanggang sa linggo. Ngunit lilimitahan ang kapasidad ng public transport upang mabawasan ang paggalaw ng mga tao.
Ang pinahihintulutan lang makabyahe papasok at sa loob ng NCR plus ay ang mga Authorized Persons Outside of their Residence (APOR ) at may mga essential o mahalagang dahilan ng pagbyahe.
Para sa mga papauwi ng bansa, limitado pa rin hanggang 1,500 na pasahero kada araw ang international inbound passenger capacity sa NAIA.
Habang papayagan pa rin ang operasyon ng domestic commercial flights ngunit batay ito sa mga restriction na ipinatutupad ng mga LGU sa labas ng greater Manila.
Binabaan naman sa fifty percent ang kapasidad sa mga pampublikong transportasyong pangdagat gaya ng mga passenger vessel.
Mas nilimitahan din sa 20 hanggang 30 percent ang passenger capacity ng lahat ng mga rail line kabilang na ang LRT-1 at 2, MRT line 3 at Philippine National Railways.
Balik din sa 50 percent ang kapasidad ng mga public utility vehicle kabilang na ang mga pampublikong bus, jeep, UV express at shuttle service.
Mahigpit na ipinatutupad ang one-seat apart rule kahit pa may plastic barrier sa loob ng sasakyan.
Papayagan din ang operasyon ng mga provincial bus ngunit dapat ay point-to-point ang byahe.
Ang TNVS at taxi ay dapat may dalawang pasahero lang kada hilera habang isang pasahero lang sa tabi ng driver.
Isang pasahero na lang ulit ang papayagan sa mga tricycle at hindi papayagan ang sinomang nakaupo sa tabi o likod ng driver.
Pati ang mga motorcycle taxi o pribadong motorcycle rider na may sakay na APOR ay pahihintulutang bumyahe gamit ang barrier sa pagitan ng driver at pasahero.
Sa kabila nito, hinihikayat naman ang publiko sa paggamit ng bisikleta at iba pang personal mobility device sa pagbyahe lalo na kung malapit lang ang destinasyon.
Asher Cadapan, Jr. | UNTV News
Tags: Cavite, ECQ, Ehanced Community Quarantine, Laguna, manila, Metro Manila, Rizal
METRO MANILA – Ipagbabawal ng pamahalaang lungsod ng Maynila ang mga tradisyong Katoliko sa Semana Santa mula Marso 28 hanggang Abril 4 ngayong taon dahil sa banta ng Coronavirus Disease 2019 (COVID-19).
Sa ilalim ng Executive Order No. 9 na nilagdaan ni Manila Mayor Francisco “Isko Moreno” Domagoso, mahigpit na ipinagbabawal ang pabasa, senakulo, Visita Iglesia, prusisyon at iba pang mga pagtitipon sa darating na holiday season.
Alinsunod sa mga regulasyon ng Inter-Agency Task Force on Emerging Infectious Diseases (IATF) ay ipatutupad din ang liquor ban, curfew hours, physical distancing at pagsusuot ng face mask at face shield.
Humingi naman ng paumanhin ang alkalde at nagbigay ng payo sa mga residente ng naturamg lungsod.
“Magnilay-nilay po tayo sa ating sari-sariling mga tahanan. Magdasal po tayo kasama ang ating pamilya, at humingi ng awa sa Diyos na matapos na sana ang pandemyang ito,” ang pahayag ni Mayor Isko Moreno Domagoso.
(Rhuss Egano | La Verdad Correspondent)
Tags: long holiday, Maynila
