Nadatnan ng UNTV News and Rescue Team ang isang motorcycle rider na nakaupo sa gilid ng kalsada sa Ortigas Extension Avenue sa Pasig City kaninang madaling araw.

Ayon sa mga nakakita sa pangyayari, nabangga ng pampasaherong jeep ang motorsiklong sinasakyan nito.

Bumaba pa umano ang driver ng jeep ngunit agad ding tumakas.

Kinilala ang biktima na si Mark Montemayor, 22 anyos at residente ng Barangay Rosario.

Nagtamo si Mark ng mga sugat sa kaliwang binti at kanang balikat dahil sa aksidente.

Matapos kuhaan ng vital signs ang biktima at malapatan ng pangunang lunas ang mga tinamo nitong sugat ay dinala na ito ng UNTV News and Rescue sa Rizal Medical Center kasama ang mga magulang nito.

Samantala iniimbestigahan na ng Pasig Traffic Sector ang pangyayari upang matukoy kung sino ang driver na nakabangga sa biktima.

(Reynante Ponte / UNTV Correspondent)

Tags: Biktima ng hit and run sa Pasig City, tinulungan ng UNTV News and Rescue Team