Itutuloy ngayong araw ng Commission on Human Rights (CHR) ang imbestigasyon nito kaugnay sa hiling ng ilang environmental group na papanagutin ang apatnapu’t pitong multinational fossil fuel companies na umano’y biggest polluters sa mundo; kabilang dito ang Chevron, ExxonMobil at Shell.
Tetestigo sa pagdinig ngayong araw ang ilang international climate experts.
Ayon kay Richard Heede, ang co-founder at director ng Climate Accountability Institute sa United States at pangunahing imbestigador ng carbon majors projects, halos two-thirds ng carbon dioxide emission mula noong 1750’s ay galing sa 90 kumpanya.
Aniya, sa labas man ng Pilipinas nag-ooperate ang mga ito ay hindi nangangahulugan na hindi nakakarating sa bansa ang epekto ng kanilang operasyon.
Wala anilang ginagawa ang mga kumpanya para mas mabawasan ang panganib na bunga ng kanilang operasyon at mas pinahahalagahan ng mga ito ang perang kikitain kaysa sa kapakanan ng mga tao sa mundo.
Ayon sa mga eksperto, dapat magsilbing paalala sa iba pang fossil fuel producers ang hakbang na ito ng CHR para ayusin ng mga ito ang kanilang operasyon.
Nakatakda ring humarap sa pagdinig ang ilang community witnesses at petitioners.
Ihahain ng mga eksperto ang resulta ng kani-kanilang pananaliksik kung paano nakaambag ang mga industriya sa paglubha ng climate change.
( Cathy Maglalang / UNTV Correspondent )
Tags: CHR, Climate Change, climate experts
Patuloy na nakararanas ng epekto ng climate change ang Pilipinas, katunayan nito ang nararamdaman nating mainit na temperatura.
Ang mga bagyong nararanasan natin ay tumataas na rin ang intensity sa 170 kilometers per hour.
Ayon sa PAGASA, sa nakalipas na sampung taon may kaunting pagtaas sa bilang ng malalakas na mga bagyo na dumadaan sa bansa.
Ayon kay Rozalinda de Guzman ang Chief ng Climate Change data ng PAGASA, maaaring magdulot ito ng mga pagkalubog sa baha ng mga low lying areas lalo na kapag tag-ulan.
Pangunahing maapektuhan nito ang mga kababayan nating nakatira malapit sa mga dalampasigan.
Apektado rin ng pagtaas ng temperatura ang ani ng mga magsasaka.
“’Pag tumaas ang temperature ng one degree centigrade ay mababawasan ‘yung yield natin ng 10% ito po ang very critical sa Pilipinas kasi po tayo ay rice eating country,” pahayag ni Rozalinda de Guzman, Chief, Climate Data Section, PAGASA.
May mga programa naman ang PAGASA at Department of Agriculture para maibsan ang epekto nito. Kasama na riyan ang paglalagay mga early warning systems sa agricultural areas. Pagtatayo ng mga PAGASA weather radar at regional flood forecasting centers sa mga probinsiya.
Batay sa projection ng PAGASA, kapag hindi naresolba ang epekto ng climate change sa bansa, pagdating ng 2050 o sa katapusan ng 21st century, tataas ng 4 degrees centrigrade ang temperatura sa bansa, patuloy na tataaas ang sea level at magiging mas madalas ang pagdating ng malalakas na bagyo.
Tags: Climate Change
METRO MANILA – Nagbabala ang Commission on Human Rights matapos na maglabas ng direktiba ang Department of the Interior and Local Government (DILG) sa mga barangay na magsumite ng listahan ng mga hindi pa bakunadong residente kontra COVID-19.
Nagpaalaala ang komisyon sa gobyerno na dapat ang paggalang sa karapatang pantao ang pangunahing konsiderasyon sa pagbuo ng mga polisiya upang tugunan ang pandemiya.
Sa isang pahayag, iginiit ni Commission on Human Rights Spokesperson Atty. Jacqueline Ann de Guia na hindi dapat magresulta sa paglabag sa karapatan sa privacy ng mga indibidwal ang hinihinging listahan ng unvaccinated residents.
Dapat ding hindi ito makapagil sa pag-access ng pangunahing pangangailangan at serbisyo ng mga hindi pa bakunado.
Ayon pa sa tagapagsalita ng komisyon, hindi dapat maging dahilan ang pandemiya upang maisantabi ang mga batas at human rights standards na nagbibigay-proteksyon sa karapatang-pantao at dignidad sa lahat ng sitwasyon.
Nanindigan naman ang DILG na walang paglabag sa privacy dahil ang pagkuha ng datos ng unvaccinated ay para sa legitimate purpose at kinakailangan ang datos upang maipatupad ng maayos ang quarantine protocols.
Mismong si Pangulong Rodrigo Duterte ang nagbigay ng direktiba na dapat limitahan ang paggalaw ng mga di pa bakunado sa gitna ng pagsipa ng COVID-19 cases sa bansa.
Kasunod nito ay nagkasundo ang Metro Manila Council na rendahan ang galaw ng mga unvaccinated at halos lahat ng lokal na pamahalaan, naglabas ng ordinansa kaugnay nito.
Gayunman, pinapayagan namang lumabas ang mga di pa bakunado kung bibili ng essential goods.
(Rosalie Coz | UNTV News)
Tags: CHR, DILG, Unvaccinated
METRO MANILA – Nagdesisyon ang Department of Justice (DOJ) na ilabas ang mga impormasyon ng 52 na kasong may kinalaman sa anti-drug operation ng pamahalaan.
Agad naman itong sinang-ayunan ng Commission on Human Rights (CHR) at sinabing umaasa sila na ang mga naturang impormasyon ay makakatulong sa pamilya ng mga naging biktima, na malaman ang naging imbestigasyon sa pagkamatay ng kanilang mga kaanak.
Matatandaan nitong Pebrero humarap sa United Nation Human Rights si DOJ Sec. Menardo Guevara at sinabi na sa kalahati ng kabuuang bilang na 5,655 na kaso laban sa kampanya kontra droga ng Administrasyonng Duterte ay nakita nilang may pagkukulang ang mga otoridad sa pagsunod ng standard protocols at sa pag-iimbestiga sa mga armas na narekober nila mula sa mga biktima.
Ayon sa CHR, sa kabila ng nakikita nilang pag-usad ng mga kaso, hinihikayat pa din nila ang gobyerno na tingnan ang iba pang kaso na may kinalaman sa EJK.
Pinaalalahanan din nila ang pamahalaan na obligasyon ng estado na pangalagaan ang buhay ng tao at magbigay ng hustisya para sa mga lalabag ng karapatang pantao nito.
Giit pa ng Human Rights na, ang mabilis at masusing imbestigasyon ang susi upang mapanagot ang mga may sala. Nakahanda umano silang umalalay sa pamahalaan upang mapabilis ang imbestigasyon at mananatili silang tapat sa kanilang mandato.
(Jasha Gamao | La Verdad Correspondent)
