Iniutos na ng Muntinlupa Regional Trial Court Branch 206 ang pag-aresto kay dating Bureau of Corrections Director Franklin Bucayu at tatlo pang kapwa akusado ni Sen. Leila de Lima. Bukod kay Bucayu, ipinaaaresto na rin si Wilfredo Elli, Joenel Sanchez na dating bodyguard ni de Lima at si Jose Adrian Dera na isa umano sa mga bagman noon ng mambabatas.
Sa kautusang inilabas ni Judge Patria Manalastas de Leon, nakitaan ng probable cause ng korte upang arestuhin sina de Lima sa kasong illegal drug trading. Walang piyansang inirekomenda para sa mga akusado. Pero dahil nakakulong na si de Lima at dating driver bodyguard na si Ronnie Dayan, itinakda na lamang ang arraignment ng dalawa sa December 8, alas 8:30 ng umaga.
Sa Bilibid naman, babasahan ng sakdal sa December 12, alas dos ng hapon ang high profile inmate na si Jaybee Sebastian na kapwa akusado rin ni de Lima. Paliwanag ng Korte, wala nang saysay ang pagtutol nina de Lima at Bucayu sa jurisdiction ng RTC matapos itong pagtibayin ng Korte Suprema kayat marapat lamang na ituloy na ang paglilitis sa kaso. Aapela naman ang kampo ni de Lima sa kautusan ng Muntinlupa RTC.
Ayon sa abogado ni de Lima, inaasahan nila na babaguhin ng prosecution ang demanda laban kay de Lima, gaya ng ginawa sa dalawa pang kaso nito.
Nag-ugat ang ikatlong kaso laban kay de Lima sa umano’y pagkunsinti nito sa talamak na bentahan ng droga sa Bilibid mula 2013 hanggang 2015.
Sinasabing nakatanggap si de Lima ng 70 million pesos mula sa mga high profile inmate galing sa pinagbentahan ng iligal na droga.
( Roderic Mendoza / UNTV Correspondent )
Tags: Dating Bucor Director Franklin Bucayu, Muntinlupa RTC, Sen. Leila De Lima
Dumating na sa Iriga City si Senator Leila de Lima para bisitahin ang kanyang otsenta’y sais anyos na inang may sakit.
Dakong alas-sais bente nang lumapag ang kanyang eroplano sa Legazpi City airport.
Mula airport, sinamahan ito ng mga tauhan ng Special Weapons and Tactics Team ng Legazpi Police and Albay Provincial Police patungo sa kanilang bahay sa Iriga.
Si de Lima ay napagkalooban ng 48-hour forlough ng Muntinlupa Regional Trial Court branch 205 at 256.
Tags: Iriga City, Sen. Leila De Lima
METRO MANILA, Philippines – Sa isang pahayag na lamang ipinaabot ng nakakulong na si Senator Leila De Lima ang pasasalamat sa limang U.S. Senators na nanawagan sa pamahalaan na siya ay palayain.
Sabi ni De Lima, sa halip na ituring na pakikialam, dapat maintindihan ng mga kritiko na nais lamang ng mga Senador na Amerikano na igiit ang kanilang pakikipaglaban para sa hustisya, human rights at demokrasya.
Sa isang resolusyon, kinondena nina U.S. Senator Marco Rubio, Edward Markey, Richard Durbin, Marsha Blackburn at Chris Coons ang pag-aresto sa human rights defenders at political leaders sa ilalim ng kasalukuyang Administrasyon.
Tinagurian ng mga ito na prisoner of conscience si De Lima na ikinulong umano dahil sa kaniyang politikal na paniniwala at kalayaan na magpahayag.
Bukod dito hinimok din ng mga ito ang pamahalaan na iurong na ang kaso laban kay Rappler Chief Executive Officer Maria Ressa at siguruhin ang kalayaan sa pamamahayag
Pero ayon kay Justice Secretary Menardo Guevarra, tila nabigyan ng maling impormasyon ang mga Senador dahil pareho lamang umanong nakasuhan sina Ressa at De Lima dahil sa paglabag sa mga batas ng bansa at ngayon ay parehong sumasailam sa patas na paglilitis sa korte.
Wala rin umanong kinalaman sa kaso ng mga ito ang human rights at freedom of the press dahil hanggang ngayon naman ay patuloy pa rin ang pag-atake ng dalawa sa pamahalaan. Ang media na nga aniya sa Pilipinas ang maituturing na pinakamalaya sa ating rehiyon.
Parinig naman ng palasyo, ‘mind your own business’ na lang dapat ang mga banyagang mambabatas at intindihin na ang sarili nilang problema.
“Well as I have said, I issued a statement on that. It’s an outrageous intrusion to our sovereignty. They have no business dictating on us on what are we going to do with suspected criminals in this country,” ani Sec. Salvador Panelo, Presidential Spokesperson.
Kasalukuyang nililitis si De Lima sa apat na kaso ng paglabag sa comprehensive dangerous drugs act of 2002 dahil sa pakikipagsabwatan umano nito na magbenta ng iligal na droga.
Si Resa naman ay nahaharap sa mga kasong libelo at paglabag sa anti-dummy law.
(Mai Bermudez | UNTV News)
Tags: Rappler CEO Maria Ressa, Sen. Leila De Lima, US Senators
Panghihimasok sa domestic affairs ng bansa – ito ang reaksyon ng Malacañang sa inilabas ng resolusyon ng Inter-Parliamentary Union (IPU) sa 139th assembly nito sa Geneva, Switzerland.
Ang IPU ay isang global organization ng mga national parliaments.
Sa resolusyon ng IPU, magpapadala umano sila ng official mission sa Pilipinas upang magsiyasat hinggil sa umano’y political persecutions laban kina Senador Leila De Lima at Senador Antonio Trillanes IV.
Ayon sa IPU, dapat na umanong palayain mula sa kaniyang pagkaka-ditene si De Lima at ihinto ang legal proceedings laban sa kaniya dahil sa kakulangan ng ebidensya at ganti lang umano ito sa kanyang vocal opposition laban kay Pangulong Duterte.
Nagpahayag naman ng pagkabahala ang IPU sa posibleng pagbuhay ng kasong rebelyon at kudeta laban kay Trillanes at sa posibilidad na maaresto itong muli.
Ayon naman kay Presidential Spokesperson at Chief Presidential Legal Counsel Salvador Panelo, ang mga pahayag na ito ng IPU ay panibagong atake at paninirang puri sa legal na proseso ng bansa.
Bukod sa inilalagay sa kahihiyan umano ang bansa sa global community, one-sided din umano ang evaluation ng IPU at nakikialam sa ating sovereignty.
Bagaman isinusulong umano ng IPU ang pagsunod sa rule of law at due process, ani Panelo, hindi naman iginagalang ng mga ito ang proseso ng mga hukuman sa Pilipinas.
Bagkus, gumawa na ito ng conclusion nang hindi man lang umano kinukuha ang pahayag ng Philippine government.
Sa isang panayam, iginiit ni Panelo na hindi welcome ang IPU kung bibisita ito sa bansa dahil manggugulo lang sila aniya sila sa Pilipinas.
( Rosalie Coz / UNTV Correspondent )
