Hindi dapat tumatanggap ng booking reservations ang mga hotel at resort sa Boracay na hindi pa nakapasa sa itinakdang environmental standards upang muling makapag-operate.
Ayon kay Tourism Secretary Bernadette Romulo-Puyat, dapat itigil muna ng mga ito ang online promotions hanggang hindi pa nakukumpleto ang hinihinging requirements ng DENR, DILG at DOT.
Babala ng kalihim, posibleng maharap sa kaso ang mga ito. Dagdag pa ni DILG Secretary Año, dapat umanong 100 percent compliant ang isang establisyemento bago sila papayagang mag-operate.
Ito ay upang maiwasan na magkaroon ng kaguluhan at mga hindi kanais-nais na karanasan ang mga turistang nagpaplanong magtungo sa Boracay.
Ang ibang mga hotel, hindi pa rin makakuha ng panibagong Environmental Compliance Certificate (ECC) dahil maliban sa walang proper waste disposal, hindi rin nasusunod and easement rule ng maraming establisyemento sa white beach at maging sa gilid ng kalsada.
Samantala, isang hotel naman sa Boracay ang nakitaan ng pekeng DENR permit.
Ayon pa kay Cimatu, napag-alaman nila na ang salarin ay isang tauhan ng may-ari ng hotel. Sasampahan naman ng kaukulang kaso ng DENR ang pumeke sa nasabing dokumento.
Requirement ng Boracay inter-agency task force sa mga establisyemento sa Boracay na maging compliant sa DENR, DILG at sa DOT upang makapag-operate sa Boracay.
Sinabi naman ni Puyat na patuloy pa rin naman umano silang tatanggap ng mga applications for compliance kahit na makapag-soft opening na sa ika-26 ng Oktubre.
( Asher Cadapan Jr. / UNTV Correspondent )
Tags: Boracay, DOT, online promotions
METRO MANILA – Bumaba ang bilang ng mga turistang bumisita sa isla ng Boracay nitong buwan ng Abril ngayong taon.
Batay sa ulat ng malay tourism office, umabot sa 182,647 ang tourist arrival sa isla mula April 1 to 30, 2024.
Mas mababa ito ng 14.5% sa kaparehong buwan noong taong 2023 na umabot sa 213,736 tourists ang bilang.
Bumaba din ang domestic tourists na mula 171,897 ay naging 145,455 na lamang ngayong taon.
Isa sa mga nakikitang dahilan dito ay ang abalang maidudulot sa mga turista pagpasok sa isla.
Pagdating pa lamang sa jetty port ay kailangan nang pumila sa 3 counter para makakuha ng ticket papasok sa isla.
Mahaba rin ang pila lalo na kapag peak season lalot maliit lamang ang caticlan jetty port.
Malaking fee rin ang babayaran ng mga turista sa pantalan pa lamang tulad ng P300 na environmental fee, arrival port fee, departure fee, pamasahe sa bangka at snorkeling fee.
Tags: Boracay, Tourist Arrival
METRO MANILA – Tinapos na ng Department of Tourism (DOT) ang kontrata nito sa DDB Philippines, ang advertising agency na gumawa ng “Love the Philippines” tourism campaign video, na naging kontrobesiyal, matapos gumamit ng stock footage ng ibang mga bansa.
Sa isang pahayag sinabi ng kagawaran, na bagaman humingi na ng public apology ang DDB at inako ang buong responsibilidad sa pangyayari, itutuloy pa rin ng ahensya ang termination proceedings sa kanilang kontrata sa nasabing agency.
Posibleng gumawa rin sila ng iba pang mga hakbang sakaling magdulot ng masamang epekto sa turismo ng bansa ang isyu.
Nauna nang humingi ng paumanhin ang DDB Philippines matapos nitong aminin na may stock videos sa bagong Love the Philippines campaign video ng DOT na inilunsad lamang noong nakaraang Linggo.
Tags: DDB PHilippines, DOT
METRO MANILA – Humingi ng paumanhin ang advertising agency na DDB Philippines sa Department of Tourism at sa mga Pilipino sa ginawa nilang “Love the Philippines” campaign video para sa kagawaran.
Sa isang pahayag inamin ng ad agency na gumamit sila ng stock footage ng ibang bansa sa paggawa ng naturang video.
Bagaman standard practice anila ito sa paggawa ng anila’y ‘mood videos’, pag-amin ng DDB Philippines, hindi tama ang pag-gamit ng video ng ibang bansa para sa pagpo-promote ng turismo ng Pilipinas.
Iginiit din ng ahensiya na walang public funds na nagamit sa paggawa ng naturang video.
Ayon naman sa DOT nagsasagawa na sila ng masusing imbestigasyon sa isyu.
Giit ng DOT, ilang beses nilang kinumpirma sa DDB ang originality at ownership ng lahat ng mga ginamit na video materials sa audio visual presentaion.
Kinumpirma nitong walang public funds na ginamit sa paggawa ng avp, gayunman papanagutin pa rin ng ahensya ang ad company.
Tags: AVP, DDB PHilippines, DOT
