Nirespondehan ng UNTV News and Rescue Team ang nangyaring aksidente sa loob ng isang subdivision sa Barangay Molino Kwatro, Bacoor City,Cavite kahapon.
Nagtamo ng mga gasgas sa kaliwang binti, at magkabilang paa ang driver ng isang tricycle matapos itong bumangga sa puno.
Agad naman nilapatan ng pangunang lunas ng grupo ang biktima na kinilalang si Crisanto Paz, kuwarenta y kwatro anyos.
Kwento ni Mang Crisanto, inaayos niya ang tarpaulin na nasa bubong ng tricycle habang nagmamaneho nang bigla itong tumakip sa mukha.
Dahilan upang hindi niya makita ang daan at tuluyang bumangga sa puno.
Samantala matapos bigyan ng first aid ay tumanggi na itong magpadala sa ospital.
(Randy Forastero / UNTV Correspondent)
Tags: Bacoor, bumangga, Cavite, Driver ng tricycle, UNTV NEWS AND RESCUE
Mananatili pa ring bukas ang lahat ng mga pampublikong transportasyon sa NCR plus habang nasa ilalim ito ng ECQ simula ngayong araw hanggang sa linggo. Ngunit lilimitahan ang kapasidad ng public transport upang mabawasan ang paggalaw ng mga tao.
Ang pinahihintulutan lang makabyahe papasok at sa loob ng NCR plus ay ang mga Authorized Persons Outside of their Residence (APOR ) at may mga essential o mahalagang dahilan ng pagbyahe.
Para sa mga papauwi ng bansa, limitado pa rin hanggang 1,500 na pasahero kada araw ang international inbound passenger capacity sa NAIA.
Habang papayagan pa rin ang operasyon ng domestic commercial flights ngunit batay ito sa mga restriction na ipinatutupad ng mga LGU sa labas ng greater Manila.
Binabaan naman sa fifty percent ang kapasidad sa mga pampublikong transportasyong pangdagat gaya ng mga passenger vessel.
Mas nilimitahan din sa 20 hanggang 30 percent ang passenger capacity ng lahat ng mga rail line kabilang na ang LRT-1 at 2, MRT line 3 at Philippine National Railways.
Balik din sa 50 percent ang kapasidad ng mga public utility vehicle kabilang na ang mga pampublikong bus, jeep, UV express at shuttle service.
Mahigpit na ipinatutupad ang one-seat apart rule kahit pa may plastic barrier sa loob ng sasakyan.
Papayagan din ang operasyon ng mga provincial bus ngunit dapat ay point-to-point ang byahe.
Ang TNVS at taxi ay dapat may dalawang pasahero lang kada hilera habang isang pasahero lang sa tabi ng driver.
Isang pasahero na lang ulit ang papayagan sa mga tricycle at hindi papayagan ang sinomang nakaupo sa tabi o likod ng driver.
Pati ang mga motorcycle taxi o pribadong motorcycle rider na may sakay na APOR ay pahihintulutang bumyahe gamit ang barrier sa pagitan ng driver at pasahero.
Sa kabila nito, hinihikayat naman ang publiko sa paggamit ng bisikleta at iba pang personal mobility device sa pagbyahe lalo na kung malapit lang ang destinasyon.
Asher Cadapan, Jr. | UNTV News
Tags: Cavite, ECQ, Ehanced Community Quarantine, Laguna, manila, Metro Manila, Rizal
Pagpapahalaga sa kalikasan ang ibig iparating ng Provincial Environment and Natural Resources Office (PENRO) ng Cavite ngayong January na kilala bilang National Zero Waste Month.
Bilang pagtugon sa adhikaing ito ng gobyerno, naglagay ng mga simpleng tips sa pangangalaga ng kalikasan ang PENRO Cavite sa kanilang official facebook page kabilang na dito ang pagdadala ng sarilig ecobags sa pamimili sa palengke at malls at pagbawas sa konsumo ng papel sa mga opisina at pag-unplug ng mga di ginagamit na electronics.
Ayon sa Ecological Solid Waste Management Act of 2000, hinihikayat ng gobyerno na maipromote ang malikhaing paggamit ng mga waste products upang maging pakikinabang muli ang mga ito kabilang na ang mga hakbang na makakatulong sa pag-iwas at pagbawas sa “volume and toxicity ng mga waste and materials”.
Marapat tandaang bawat mamamayan ay may kaukulang parte sa pagpapanatili sa kalinisan at pagpapalago ng ating kalikasan dahil maraming benepisyo ang nakukuha ng ating kalusugan.
(April Jan Bustarga | La Verdad Correspondent)
MANILA, Philippines – Magpapatupad ng water service interruption ang Maynilad sa ilang lugar sa Las Piñas, Muntinlupa, Parañaque, at Cavite hanggang sa Linggo.
Batay sa abiso ng maynilad tinatayang mahigit 170,000 water connection sa kanilang mga customer ang maapektuhan ng ipatutupad na rotational water service interruption.
Mawawalan ng suplay ng tubig ang ilang lugar sa Las Piñas mula alas-6 ng umaga hanggang alas-4 ng madaling araw.
Habang sa Muntinlupa naman magsisimula ang water supply interruption ng alas-5 ng hapon hanggang alas-4 ng madaling araw.
Pagpatak naman ng alas-2 ng hapon mawawalan na rin ng tulo sa mga gripo ang ilang barangay sa Parañaque city na tatagal hanggang ala-1 ng madaling araw.
Habang magkakaibang oras naman ang schedule na mawawalan ng tubig sa ilang bayan sa Cavite.
Ayon kay Jennifer Rufo ang tagapagsalita ng maynilad, muli na namang dumadami ang algae o lumot sa Laguna lake na siyang pinagkukunan nila ng suplay ng tubig.
At upang mapigilan ang paghalo ng lumot sa tubig napilitan silang limitahan ang suplay sa kanilang mga customer.
“So dahil dumami muli ang algae concentration nagkaroon ng panibagong pagbabara sa filter namin sa treatment plants, so this has forced us to reduce production dahil kailangan nga natin ng mas frequent na cleaning ng filters and at the same time intensified chemical dosages para ma-address ang pagdami ng algae sa laguna lake” ani Maynilad Spokesperson Jeniifer Rufo.
Tatagal ang rotational water service intteruption hanggang sa June 9. Sisikapin umano ng maynilad na hindi na ito mapalawig, bagaman hindi nila iniaalis ang posibilidad na hindi ganap na maibalik ang suplay ng tubig sa nasabing petsa.
“Meron kasi tayong external factors na tinitignan rin kapag sabay sabay na magbukas ng gripo anv ating mga customer upon supply resumption kahit papaano may impact yan duon sa areas na malalayo or yung matataas ang elevation kaya naapektuhan yung accuracy ng ating resumption schedule” ani Maynilad Spokesperson Jeniifer Rufo.
Samantala, para sa kumpletong listahan ng mga lugar na mawawalan ng suplay ng tubig,maaring bisitahin ang social media accounts ng maynilad o tumawag sa kanilang hotline na 1626 para sa mga taga Metro Manila.
Maari namang kumontak ang mga taga Cavite sa numerong 1800-1900-92837.
(Joan Nano | Untv News)
Tags: Cavite, Laguna Lake, Las Piñas City, Maynilad, water service interruption
