METRO MANILA – Muling nakapagtala ang Pilipinas ng mahigit 10,000 kaso ng COVID-19 sa loob ng isang araw makalipas ang halos 3 buwan.

Noong Biyernes umabot ito sa 10,623 at 11, 021 naman noong Sabado. April 17 ngayong taon nang huling makapagtala ng mahigit 11,000 cases sa bansa

Ayon sa Department Of Health (DOH), simula pa lang ang pagpalo ng kaso at tataas pa ang bilang na ito sa mga susunod na araw.

“Nararamdaman na po natin ang epekto ng delta variant dito po sa ating bansa. Amin po naming nakikta based also on projections na tataas pa rin po ang mga kasong ito. Ito pong ginagawa natin ngayon na paghihigpit na restrictions or classifications ay ang ating adhikain dyan is to delay further increase pero hindi niyan patitigilin tutuloy pa rin ang pagtaas pero ang ating ginagawa ngayon is to prepare our system for this continuous increase in the number of cases” ani DOH Spokesperson, Usec. Maria Rosario Vergeire.

Batay sa ulat ng DOH 64% na sa mga ICU bed ang okupado sa buong bansa. At 45% rin sa mga ventilators ang ginagamit na.

Nagbigay naman ng direktiba ang DOH sa mga ospital na ilipat sa mga pasilidad ang mga mild at asymptomatic cases upang may paglagakan ng mga severe at critical COVID-19 patients sa mga ospital.

“Pinadagdagan po natin ang mga ICU, pinapa- decongest natin ang mga hospital dito sa mga mild at asymptomatic at ililipat po sila sa mga step down facilities. Hindi naman po para tanggihan ang mga pasyente sa ating hospital. Ire- redirect lang po sila that’s why we are asking our local governments and hospital facilities to have a navigation system” ani DOH Spokesperson, Usec. Maria Rosario Vergeire.

Kasabay ng pagtaas ng kaso sa bansa, hinihikayat ng DOH ang mga nasa priority sector na magpabakuna na.

Sa inisyal na ulat ng Philippine General Hospital, karamihan ng mga na-ospital at nagkaroon ng severe COVID-19 infection ay hindi bakunado

May pag-aaral din ang DOH at healthcare workers kung saan nakita na ang mga nahahawa ng Delta variant at nasasawi ay mga hindi pa nakakapagbakuna.

Sa 9 na nasawi dahil sa Delta variant sa Pilipinas, 3 sa mga ito ang hindi pa nakakatanggap ng kanilang COVID-19 shot. 5 sa mga ito ay bineberipika pa ang vaccination status.

“When it comes to death, nakita po natin sa pag- aaral na ito although as I’ve said this is still initial, nakita natin unvaccinated po talaga iyong mga namamatay and wala po tayong naitalang namatay among those vaccinated in different hospitals included in this study” ani DOH Spokesperson, Usec. Maria Rosario Vergeire.

Sa kasalukuyan Beta variant pa rin na unang natuklasan sa South Africa ang dominant variant sa Pilipinas na may 2, 362 cases, 450 naman ang Delta variant cases.

(Aiko Miguel | UNTV News)

Tags: COVID-19 Delta Variant, DOH