Nagpamalas ng pambihirang galing sa produksyon at photography ang mga mag-aaral ng La Verdad Christian College sa sunod-sunod na pagkapanalo ng mga ito sa iba’t-ibang kumpetisyon.

Sa daan-daang entry na nagpasa mula sa iba’t-ibang bahagi ng bansa ay nakuha ng La Verdad ang grand prize sa student film category ng Cinema One Originals Festival at videomaking category ng Vision Petron.

Bagaman ito ang unang beses na sumali ang paaralan sa naturang mga kategorya, napahanga ng mga mag-aaral ng La Verdad ang mga eksperto at media practitioners sa ibang mga bansa.

Ang kanilang entry ang naging pambato ng Pilipinas at nag-uwi ng grand prize sa kauna-unahang Southeast Asia Prix Jeunesse. Nagwagi rin kahapon ang entry ng La Verdad student sa ASEAN Photo Contest.

Malaki naman ang pasasalamat ng mga ito sa paaralang tumulong sa kanila na linangin ang kanilang mga kakayahan.

Kinilalang katangi-tangi ang mga gawa ng La Verdad students hindi lamang dahil sa creativity nito kundi sa mga aral na nakapaloob sa kanilang entries na anila’y kanilang natutunan sa paaralan.

Ang La Verdad Christian School and College ay itinatag nina Brother Eli Soriano ng Members Church of God International at Mr. Public Service Kuya Daniel Razon sa layuning matulungan ang mga mahihirap na kabataang nais makapag-aral.

Ang mga iskolar ng La Verdad ay libre sa tuition fee, mga libro, uniporme at pagkain. Bukod sa libre at kalidad na edukasyon, kilala ang La Verdad sa pagbibigay prayoridad sa pagtuturo ng kagandahang asal sa kanilang mga mag-aaral.

( Leslie Longboen / UNTV Correspondent )

Tags: filmmaking at photography, La Verdad Christian College, umaani ng pagkilala