Umabot sa mahigit 30 palapag ng 75 storey residential skyscraper na Sulafa tower ang napinsala ng sunog kahapon sa Dubai.

Ayon sa mga otoridad, nagsimula ang sunog sa 35th floor ng gusali na agad kumalat sa iba pang palapag dahil sa lakas ng hangin.

Agad namang rumesponde ang mga emergency personnel upang ilikas ang mga residente.

Ayon sa Dubai Civil Defense wala namang naitalang casualty o injury sa nangyari.

Subalit isang kababayan natin na nakatira at nagtatrabaho bilang stay out baby sitter sa 63rd floor ang humingi ng tulong sa UNTV News dahil kasamang nasunog ang kaniyang mga dokumento.

Agad nating itinawag kay Consul General Paul Raymond Cortes ang problema at pinayuhan siyang pumunta sa konsulado upang magrenew ng passport ng libre.

Samantala, patuloy na nakikipagugnayan ang konsulado sa Dubai authorities kung may iba pang Pilipinong naapektuhan sa pangyayari.

Ang Sulafa tower ay isang 75-storey skyscraper, na may total structural height na 235 meters. Ito’y itinuturung na ikadalawamput tatlo sa pinakamatataas na gusali sa Dubai at 127th tallest building sa buong mundo.

(Jeffrey Reyes/UNTV Radio)

Tags: skyscraper, Sulafa tower