Tatlo ang nasawi ng matabunan ng lupa ang bahay ng isang pamilya sa Carrascal, Surigao del Sur kaninang madaling araw. Kinilala ang mga biktima na sina Irene Benguilo, ang mga anak nitong sina AJ, anim na taong gulang at MJ, tatlong taong gulang.
Nagpapagaling naman sa ospital ang padre de pamilya na si James Benguilo na siyang tanging nakaligtas sa sakuna. Dalawa naman ang patuloy na pinaghahanap ngayon ng mga otoridad.
Dahil naman sa tuloy-tuloy na pag-ulan dulot ng bagyong Basyang, hindi na madaananan sa ngayon ang Puyo Bridge sa Jabonga, Agusan del Norte at ang Mahayahay Foot Bridge sa Kitcharao matapos itong masira dahil sa malakas na pagragasa ng tubig.
Sa ngayon, halos 2 libong residente na ang inilikas sa Surigao del Norte at Surigao del Sur na nasa 17 evacuation centers.
Ayon kay NDRRMC Spokesperson Romina Marasigan, tuloy din ang rescue operations sa Surigao City dahil sa pagragasa ng tubig. Pinayuhan na nila ang mga lokal na pamahalaan na ilikas na ang mga residente na nakatira sa landslide prone area partikular sa barangay Gamuton.
Samantala, mahigit dalawang daang pasahero na ang stranded sa Roxas Port sa Oriental Mindoro na biyaheng Caticlan at Odiongan Romblon.
Pinagbawalan na rin ng PCG ang pagbiyahe ng mga fast craft at mga motor bangka sa Batangas na biyaheng Puerto Galera at Calapan Oriental Mindoro. Kanselado rin ang biyahe ng maliliit na sasakyang pangdagat mula Calapan patungong Batangas Port dahil sa malakas na alon ng dagat.
Sa huling tala ng Philippine Coastguard, aabot na sa halos apat na libong pasahero ang stranded sa mga pantalan sa bansa.
( Raymond Octobre / UNTV Correspondent )
Tags: landslide, patay, Surigao del Sur
METRO MANILA – Posibleng magdeklara ng state of calamity ang probinsya ng Surigao Del Sur, kasunod ng 7.4 magnitude na lindol na tumama sa lalawigan noong Sabado (December 2) ng gabi.
Sa ngayon ay patuloy na nararamdaman ang malalakas na aftershocks sa probinsya.
Batay sa report ng Philippine Institute of Volcanology and Seismology (PHIVOLCS), halos 2,000 aftershocks pa ang naitala sa lugar hanggang kahapon (December 4).
Mayroong itong lakas na umaabot sa 1.4 hanggang 6.6 magnitude, kung saan 19 sa mga ito ang naramdaman.
Sa datos ng Provincial Disaster Risk Reduction and Management Office (PDRRMO), aabot na sa mahigit P58-M ang halaga ng pinsalang idinulot ng lindol.
Base sa naunang report, 2 ang naitalang nasawi, habang mahigit sa 57,000 mga pamilya ang naapektuhan ng kalamidad.
Kahapon (December 4), nagsimula na ang ang pamamahagi ng food packs ng Department of Social Welfare and Development (DSWD).
Tags: DSWD, PHIVOLCS, Surigao del Sur
Pitong buwan na mula nang maka-uwi sa bansa ang dalawang taong safety officer sa Saudi Arabia na si Jorick Butron.
Hindi umano nagpapasweldo ng maayos ang kanilang kumpanya kaya napilitan siyang mag-resign at humingi ng tulong sa Overseas Workers Welfare Administration (OWWA).
Biktima naman umano ng breach of contract ang 27 anyos at walong buwang ding safety officer sa Gitnang Silangan na si Kenneth Diorico. Naka-uwi man siya sa Pilipinas sa tulong din ng pamahalaan, wala naman siyang naipong pera upang makapagsimula muli sa paghahanap-buhay.
Parehong ang problema nina Jorick at Kenneth, ito ay kung paano sila babangong muli matapos ang mapait na karanasan sa ibang bansa.
Pero noong Sabado, muling nabuhayan ng loob na magsimula muli sina Jorick at Kenneth matapos mapabilang sa siyam na distressed OFW sa Surigao del Sur na pinagkalooban ng 20,000 livelihood assistance sa pamamagitan ng balik Pinas, Balik Hanapbuhay program ng OWWA at 10,000 naman mula sa Villar Sipag Foundation.
Kaugnay ito ng pagdiriwang OFW Day ngayong taon.
Upang mapalago pa ang perang natangap ng mga OFW, sasailalim din sila sa iba’t-ibang financial seminars.
Base sa datos ng OWWA, mayroon nang humigit kumulang labing dalawang milyong OFW ang nagtatrabaho sa iba’t-ibang bansa.
Taon-taon isinasagawa ng pamahalaan ang OFW Day bilang pagbibigay halaga sa pagsisikap ng mga bagong bayaning tinitiis na mawalay sa pamilya maiahon lang ang mga ito sa hirap.
( Raymond Octobre / UNTV Correspondent )
Nabulabog ang mga residente ng Sitio San Roque sa Barangay Bagong Pag-asa, Quezon City nang makarinig ng sunod-sunod na putok ng baril pasado alas onse kagabi.
Pinagbabaril ng hindi pa nakikilalang suspek ang tatlong magkakaanak habang magkakatabing natutulog ang mga ito sa loob ng kanilang bahay.
Kinilala ang mga ito na sina Romeo Ado Sr., ang asawa nitong si Christine Ado, at ang labing-isang taong gulang na anak na si Romeo Ado Jr.
Ayon sa mga otoridad, isang witness ang nakakita sa suspek na mag-isang naglakad papunta at paalis sa bahay ng mga biktima. Nagtanong pa umano ang suspek sa saksi bago mangyari ang krimen.
Ilang saglit pa ay hindi bababa sa walong putok ng baril ang narinig mula sa loob ng bahay pamilya Ado.
Nagtamo ang mga biktima ng mga tama ng baril sa ulo at iba pang bahagi ng katawan. Na-recover sa lugar ang mga basyo ng bala ng 9 mm pistol.
Suspetsa ng kaanak ng mga biktima, maaaring may kinalaman ang insidente sa iligal na droga. Bumuo na ng tracker team ang Quezon City Police District na tutugis sa suspek.
( Asher Cadapan Jr. / UNTV Correspondent )
Tags: patay, Quezon City, Suspek
