ALBAY, Philippines – Binawi na ng partido Lakas-Christian-Muslim Democrats (Lakas-CMD) ang suporta nito sa kandidatura ni Daraga Mayor Carlwyn Baldo sa pagka-alkalde sa May 2019 elections
Sa isang press release mula sa partido, sinabi ng mga ito na kanila na ring ni-revoke ang Certificate of Nomination and Acceptance (CONA) ng alkalde na isinumite sa Commission on Elections (COMELEC) kasabay ng paghahain nito ng kandidatura
Naipaabot na rin nila tungkol dito sa law department ng Commission on Elections (COMELEC) gayundin sa provincial election supervisor ng Albay at municipal election officer ng Daraga.
Ayon sa partido, naabot nila ang desisyon na ito matapos na pangalanan ng Philippine National Police si Mayor Baldo bilang mastermind sa pagpaslang kay Ako Bicol Party List Representative Rodel Batocabe. Alinsunod anila ito sa kanilang commitment para sa isang tapat, malinis at mapayapang halalan
Ayon naman sa COMELEC, bagaman binabawi na ng Lakas-CMD ang suporta at naisumiteng CONA para kay Mayor Carlwyn Baldo ng Daraga, Albay, hindi ito nangangahulugan ng disqualification. Maaari pa rin itong tumakbo bilang independent candidate basta’t makakasama ito sa ilalabas nilang opisyal na listahan ng mga kandidato para sa May 2019 elections.
Sa ngayon ay sinusubukan pa ng UNTV News and Rescue na kunin ang pahayag ni Mayor Baldo tungkol sa isyu.
(Aiko Miguel | UNTV News)
Tags: Commission on Elections (COMELEC), Daraga Mayor Carlwyn Baldo, Lakas-Christian-Muslim Democrats, Lakas-CMD
