Sa kabila ng masamang panahon, sumugod ang iba’t-ibang grupo sa Edsa People’s Power Monument kagabi. Sigaw nila ang hustisya para sa grade 11 student na si Kian Delos Santos na napatay ng mga pulis sa isang operasyon sa Caloocan noong nakaraang Linggo at iba pa umanong inosenteng biktima ng extra judicial killings.
Ayon sa mga ito, susundan pa nila ito ng mas marami pang protesta hanggang sa makamit ng mga biktima ang hustisya.
Samantala, naglakad naman ang mga kaanak ni Kian at iba pang Human Rights Advocates mula Sta. Quiteria Church hanggang sa lugar kung saan napatay ang binatilyo.
Ngunit bago makarating sa lugar, saglit na huminto ang mga ito sa tapat ng isang police station na nadaanan at naglabas ng kanilang mga hinaing.
Kasamang nakisa sa kilos protesta sina dating Congressman Neri Colmenares at Alliance of Concerned Teachers Party-list Representative Antonio Tinio.
(Macky Libradilla / UNTV Correspondent)
Tags: Edsa People's Power Monument, Kian Delos Santos, nag-rally sa Edsa
Welcome development para sa Commission on Human Rights (CHR) ang ibinabang guilty verdict ng Caloocan Regional Trial Court Branch 125 sa tatlong pulis kaugnay ng pagpatay sa 17 anyos na si Kian delos Santos.
Nagpasalamat si CHR Commissioner Chito Gascon sa lahat ng mga tumulong para makamit ang hutisya kabilang na ang mga testigo, human right defenders, mga imbestigador at ang mga prosecutor na humawak sa kaso. Pinuri naman ng Malacañang ang mabilis na resolusyon sa kaso.
Ayon kay Presidential Spokesman Secretary Salvador Panelo, ang pagkaka-convict sa tatlong pulis ay patunay na patuloy na umiiral ang judicial system sa bansa. Naniniwala ang Malacañang na hindi bibigyan ng pardon ng Pangulo ang tatlong pulis.
Dagdag pa ni Panelo na ang ginawa ng mga ito ay hindi sakop ng pangako ng Pangulo na siya ang mananagot sakaling may mapatay ang mga alagad ng batas sa pagganap ng kanilang tungkulin.
Samantala, nanawagan naman si Gascon sa pamahalaan na paigtingin ang kampanya para makamit ng iba pang biktima ng extra judicial killings (EJK) sa bansa ang hustisya.
( Rosalie Coz / UNTV Correspondent )
Tags: Kian Delos Santos, Malacañang, pardon
Binweltahan ni Pangulong Rodrigo Duterte si Senator Risa Hontiveros sa pahayag nitong may polisiya umano ang administrasyong Duterte na patayin ang mga sangkot sa iligal na droga, ayon sa punong ehekutibo, kaignorantehan ito.
Ito ang sagot ni Pangulong Rodrigo Duterte sa tanong ni Senator Risa Hontiveros sa pagdinig ng senado kahapon kaugnay sa pagkamatay ni Kian Delos Santos.
Ayon sa Pangulo, isang insulto na sabihin na polisiya ng pulisya ang pagpatay sa mga sangkot sa illegal drugs. Aniya, naghahanap lang ng butas ang senadora laban sa kanyang administrasyon.
Kaugnay nito, ipinag-utos ng Pangulo sa PNP na magsama ng media sa mga operasyon nito upang maiwasan ang mga pagdududa lalo na tuwing may napapatay sa anti-illegal drug operation.
Samantala, tinuligsa naman ni Pangulong Duterte ang alok na isang milyong pisong pabuya ni Iloilo City Mayor Jed Patrick Mabilog sa sinomang makapagbibigay ng impormasyon sa ikadarakip ng mga drug suspect.
(Macky Libradilla / UNTV Correspondent)
Tags: duterte, Kian Delos Santos, Sen. Hontiveros
Tahasang itinuro ng 31 yrs old na si MC, hindi tunay na pangalan, ang dalawa sa apat na pulis na nakita umano niyang bumibitbit kay Kian Delos Santos noong gabi ng August 16.
Ito ay sina PO3 Arnel Oares at PO1 Jeremias Pereda na nakatalaga sa Caloocan City. Si PO3 Oares umano ang nagpaputok ng baril na pumatay kay Delos Santos.
Tumanggi namang magsalita ang apat na pulis partikular na ang mga itinuro ng testigo at in-invoke ang self incrimation.
Dito na tinanong ni Senator Risa Hontiveros si PNP Chief General Ronald Bato Dela Rosa tungkol sa polisiya ng administrasyon sa war on drugs. Emosyonal naman na nagpaliwanag ang hepe ng pambansang pulisya. Maging ang hepe ng Public Attorneys Office ay ‘di na rin napigilang dumipensa sa mga pahayag ng senadora.
Kaugnay ng mga nasasangkot na mga batang pulis, hiniling ni Dela Rosa sa mga senador na pag-aralan na ibigay lamang sa kanila ang kapangyarihan na magsanay sa mga nagnanais maging pulis.
(Nel Maribojoc / UNTV Correspondent)
