Humingi ng paumanhin si Department of Transportation Secretary Art Tugade sa lahat ng mga pasahero na naabala ng pagsasara ng runway kahapon dahil sa emergency repair ng natuklap na aspalto.
Ayaw isisi ni Tugade sa nakaraang administrasyon ang problema at sinabing inaako niya ang lahat ng responsibilidad sa pagka-divert sa sampung international at domestic flights sa Clark International Airport.
Magpapatupad ng bagong Standard Operating Procedure o SOP ang transportation department hinggil sa mga ganitong kaso.
Balik operasyon na ang buong NAIA complex matapos maisailalim sa repair ang natuklap na aspalto sa runway 6-24 kagabi.
10:35pm ng matapos ang repair, subalit daang flights ang naapektuhan.
Bagamat sinabi ng MIAA na hindi substandard ang aspalto patitignan pa rin ito ng Department of Transportation, sa pamamagitan nito makagagawa ng mas maayos na plano ang MIAA sa mga susunod na araw.
Taong 2013 ng huling mag aspalto sa runway at taong 2018 pa sana ito ma-overdue subalit nasira na ito ngayon.
Nagpasalamat naman ang Civil Aeronautics Board sa mga airline companies, ayon sa C-A-B, force majeure ang nangyari at walang pananagutan ang mga airline company sa mga pasahero.
Subalit imbes na mangingil, hindi na nagpabayad ng booking fee at namigay pa ng ilang pagkain ang ilang airline company.
Sa kabila nito, nais ng CAB na magkaroon ng maayos na emergency plan sa mga kagayang sitwasyon, para na rin sa kapakanan ng mga pasahero.
Bukas naman ang tanggapan ng C-A-B sa mga reklamo ng ilang mga apektadong pasahero.
(Mon Jocson / UNTV Correspondent)
Tags: Department of Transportation, Natuklap na aspalto sa NAIA runway
Nakahanda ang mga transport group na sumunod sa bagong polisya ng Department of Transportation na nagbabawal sa mga kababayan na sumakay sa mga pampublikong transportation sa Metro Manila kapag hindi pa fully vaccinated kontra Covid-19, kaya naman hindi na rin muna nila papayagan ang kanilang mga jeepney driver na mamasada kung hindi pa sila bakunado.
Ayon sa presidente ng pasang masda na si Obet Martin, mula sa mahigit 2000 operator at jeepney driver na kanilang miyembro, may ilang pa rin ang hindi pa nagpapabakuna laban sa Covid-19.
“May penalty yan eh hindi namin pinalalabas, bawal yun. Sapagka’t tayo’y nagiimplement, kailangan tayong implementor as driver ay kailangang tayo’y bakunado, ngayon kung hindi ka naman bakunado huwag kang lumabas”, ani Roberto “Ka Obet” Martin,
National President, Pasang Masda.
At para matiyak na fully vaccinated na ang mga driver, pinapayuhan sila na isabit na ang kanilang mga vaccination card para makita ng mga pasahero gayundin ang mga nakakasama nilang konduktor.
Maging ang Federation of Jeepney Operators and Drviers Association of the Philippines, hindi na muna papayagang mamasada ang driver na unvaccinated.
At dahil epektibo na sa Lunes ang no vaccination no ride policy ng DOTR, sa mga terminal pa lamang ay mahigpit nang iinspeksyunin ang vaccination card ng mga pasahero.
Pero exempted pa rin naman ang mga may medical conditions basta meron medical certificate gayundin ang iba pang kasama sa exemptions ng DOTR.
“Kami naman po handa namang sumunod kung ito po’y ikabubuti ng mga Pilipino lalong lalo na sa hanay ng transportasyon”, ayon kay Ricardo ‘Boy’ Rebaño, National President, FEJODAP.
Samantala para naman sa Pilipino Society and Development Advocates Commuter-consumer, nangangamba ang mga ito na magreresulta sa paglaganap ng mga colorum na sasakyan ang bagong patakaran ng DOTR.
Giit nila posibeleng pagmulan ng hawaan kung sa colorum sasakay ang ang commutter lalo’t hindi sila nare-regulate ng pamahalaan.
“Baka doon sa colorum magkaroon ng pagkalat o kaya outbreak itong disease sapagka’t hindi naman ho namomonitor ng pamahalaan yan, hindi rin sila nagsasagawa ng mga IATF health protocols so papaano ho nila masisigurado na ‘yung mga commuters natin na binibiktima nila araw-araw eh unvaccinated or vaccinated”, pahayag ni Richard Rivera,
National President, PASADA CC.
Sa opisyal na pahayag ng DOTR kahapon, (Jan. 13), muling iginiit nito na nais lamang ng pamahalaan na protektahan ang mas nakakararami, mapabakunado man o hindi.
Ayaw na rin ng DOTR na muling humantong sa tuluyang pagsasara ng public transportation sakaling magtuloy-tuloy pa ang pagdami ng Covid-19 cases sa Metro Manila.
JP Nuñez | UNTV News
Tags: Covid-19 Vaccines, Department of Transportation, DOTr, Pasang Masda
METRO MANILA, Philippines – Bibiyahe na sa kauna-unahang pagkakataon ang unang Dalian train set sa linya ng MRT-3 ayon sa Department of Transportation.
Patatakbuhin ito sa normal na operasyon simula mamayang alas otso y medya hanggang alas diyes y medya ng gabi.
Ito’y matapos na payagan ng Sumitomo Corporation Mitsubishi Heavy Industries – TES Philippines ang deployment ng Dalian train. Subalit limitado pa lamang ang biyahe nito na tatagal hanggang sa nobyembre bilang bahagi ng initial trial run nito.
Ang isang Dalian train set ay binubuo ng tatlong bagon na kayang magsakay ng higit isang libong mga pasahero kada biyahe.
(Joan Nano)
METRO MANILA, Philippines – Aarangkada na sa ikatlong linggo ng Hunyo ang anim na buwang pilot test run ng motorycle ride hailing service na Angkas.
Kasunod ito ng pagpayag ng Department of Tranportation na ligal silang makapag-operate. Pero bago sumabak sa pilot test run, sasailalim muna sa isang araw na re-training ang dalawamput-pitong libong partner riders nito upang turuan ng kasanayan para sa ligtas na pagbiyahe, at ipaintindi ang responsibilidad sa kaligtasan ng mga pasahero.
Ilang bagong gamit ng mga riders ang inilusad ng Angkas gaya ng vest kung saan nakakabit na ang mismong ID at nakasulat rin sa likod ang ID number ng rider upang mas madaling matukoy ang pagkakakilanlan nito. May side strap na rin ito na hawakan ng pasahero, sakaling ayaw nilang yumakap sa rider. Bibigyan rin ang mga pasahero ng kanilang hairnet at face mask bilang dagdag na proteksyon bukod pa sa helmet.
“We need to retrain those bikers and to remind them kung ano yung napagkasunduan sa pilot syempre maraming hinihingi yung government sa atin and basically we have to adhere sa standard na binigay ng government sa atin,” ani David Medrano, Operations Head ng Angkas.
“Ang pinakakagandahan ngayon yung safety mare-recall namin na laging i-apply araw araw,” ayon kay Reynante Doctor, Angkas rider.
“Restricted na po kami for 60 kph tapos 10 hours nalang po yung biyahe namin so ise-self regulate po namin,” ani Juancho Kiang isa ring Angkas rider.
Sasagutin ng mga rider ang gastos para sa mga bagong gear, pero tiniyak ng Angkas na hindi ito idadagdag sa pasahe.
“Wala pong magbabago sa pamasahe sa Angkas it will still be 50 pesos for the first 2 kms and 10 pesos for additional kilometers,” dagdag ni David Medrano ang Operations Head ng Angkas.
Sakali namang maaksidente tiniyak ng Angkas na mayroong matatanggap na insurance ang kanilang mga pasahero. P450,000 kung namatay o naputulan ng parte ng katawan habang P100,000 naman ang maaaring i-reimburse sa nagastos sa pagpapaospital. Kabilang ang mga ito sa mga kondisyong ibinigay ng transportation department bago ang pilot test run.
Sa loob ng anim na buwan, mahigpit na oobserbahan ng DOTR ang serbisyo at mga aksidente na posibleng kasangkutan ng Angkas.
At ito ang magiging batayan ng kanilang rekomendasyon kung tuluyan nang pahihintulutan ang mga motorcycle taxi. Subalit kakailanganin pa rin munang magpasa ng batas ang Kongreso para sa paggamit ng motorsiklo bilang pampublikong sasakyan.
(Joan Nano | UNTV News)
Tags: Angkas, Department of Transportation, DOTr
