367% ang naitalang pagtaas sa kaso ng measles o tigdas sa bansa ngayong taon kumpara noong 2017. Sa tala ng Department of Health (DOH), mula Enero hanggang Nobyembre 2018, mahigit 17, 000 ang naitala nilang kaso ng tigdas.
Ayon kay DOH Secretary Francisco Duque III, lumobo ang kaso ng tigdas sa bansa dahil sa kawalan ng tiwala ng publiko sa immunization program ng pamahalaan dulot ng kontrobesiya sa Dengvaxia.
Mula aniya nang pumutok ang isyu ng Dengvaxia, maraming mga Pilipino na ang natakot magpabakuna, kahit pa ng mga bakunang matagal nang napatunayang epektibo gaya ng bakuna sa tigdas.
Ito ang dahilan kung bakit nakapagtala na rin ang DOH ng mga measles outbreak sa Zamboanga noong Pebrero kung saan anim ang naitalang nasawi.
Nitong Oktubre, nakapagtala rin ng 300% pagtaas ng kaso ng tigdas sa Bicol.
At kahapon lamang, labing walo na ang naitalang nasawi sa tigdas sa Sarangani Province mula sa walumpu’t apat na tinamaan ng sakit doon.
Karamihan sa apektado ng tigdas ay nasa apat na buwan hanggang 40 taong gulang at karamihan ay mga babae. Nakitaan ang mga ito ng mga sintomas gaya ng lagnat, sipon, ubo, pamumula ng mata, pamamaga ng lalamunan at rashes sa buong katawan. Lahat ng mga naitalang may tigdas ay hindi pa nagkakatigdas noon.
Bumuo naman ng investigating team ang DOH para sa naturang mga kasong naitala sa Sarangani Province. Ang mga kaso ay mula sa B’Laan Tribe na hindi sanay magpabakuna.
Ayon pa kay Sec. Duque, conflict-affected area din ang mga lugar kaya isa rin itong dahilan kung bakit hindi agad naabot ng serbisyong medikal ng pamahalaan.
Samantala, nabakunahan na ng DOH ang dalawang daang bata sa mga lugar kung saan may naitalang kaso ng tigdas upang huwag nang mahawa ang mga ito.
( Aiko Miguel / UNTV Correspondent )
METRO MANILA – Nilinaw ng Department of Health (DOH) na walang naiulat na nasawi dahil sa Monkeypox na tinatawag na ngayong MPOX.
Ayon kay Health Assistant Secretary Albert Domingo, walang pasyenteng nasawi sa MPOX mula sa anomang rehiyon ng bansa .
Nilinaw ito kasunod ng ulat na iniimbestigahan ng DOH sa Central Visayas ang pagkasawi ng isang 27-anyos na lalaki mula sa Negros Oriental, sa pinaghihinalaang kaso ng MPOX.
Paliwanag ni Asec. Domingo, halos magkahawig kasi ang mga butlig o sintomas ng chickenpox, shingles, herpes, at MPIX.
Kaya paalala niya na antayin ang opisyal na pahayag mula sa DOH at iwasan ang paggamit ng hindi beripikadong impormasyon.
METRO MANILA – Umakyat na sa 9 ang bilang ng mga nagpositibo sa sakit na Pertussis sa buong Caraga region mula January 1 hanggang kahapon, June 3.
Ayon sa Department of Health (DOH), mula sa 5 ay naging 9 ang nagpositibo sa rehiyon sa pagpasok ng buwan ng hunyo. 7 rito ay mula sa Surigao Del Norte habang tig-1 naman sa Agusan Del Norte at Agusan Del Sur.
Samantala, nasa 7 naman ang bagong suspected cases na naitala sa rehiyon. Sa ngayon 3 na ang nasawi dahil sa sakit na Pertussis sa Caraga.
Paalala ng kagawaran sa publiko na ang nasabing sakit ay nagsisimula lamang sa mild cough at lagnat na umaabot hanggang 2 Linggo, at pag-ubo naman na umaabot hanggang 6 na Linggo kaya mas maiging magpatingin agad sa doktor kung makaranas ng mga sintomas na ito upang hindi na lumala pa.
METRO MANILA – Binalaan ni House Deputy Majority Leader at dating Department of Health (DOH) Secretary Janette Garin ang publiko laban sa paggamit ng vape.
Kasunod ito ng naitalang kauna-unahang kaso ng pagkamatay sa Pilipinas dahil sa paggamit nito kung saan ang isang 22 anyos na lalaki ang nasawi matapos ang tuloy-tuloy na paggamit ng vape sa loob ng 2 taon.
Sa isang pahayag, sinabi ng mambabatas na kailangan mamulat na ang lahat sa panganib ng paggamit ng naturang device lalo na sa mga kabataan dahil sa masamang epekto nito sa katawan na maaaring mauwi sa kamatayan.
Ikinababahala ni Representative Garin ang mga ulat na nagsasabing may mga kabataang edad 13 anyos ang nahuling gumagamit na ng e-cigarette at vapes kaya muli nitong binigyang-diin na hindi safe na gawing alternatibong paraan ang nasabing kagamitan para maiwasan ang paninigarilyo.
