Ipinag-utos na ni Pangulong Rodrigo Duterte ang pagsugpo sa bandidong grupong Abu Sayyaff.
Ito ay matapos malaman ng pangulo sa press conference nito sa Davao City pasado ala una kaninang madaling araw na pinugutan na umano ng ulo ang disi otso anyos na bihag ng ASG na si Patrick Almodovar nang hindi maibigay ng pamilya nito ang isang milyong pisong ransom money.
Natagpuan umano sa sulu ang ulo ng biktima na nakabalot sa isang plastic bag matapos itong iwanan ng tatlong lalaking nakasakay sa motorsiklo.
A-disi sais ng hulyo ng dukutin si Patrick sa Jolo, Sulu.
Ayon sa pangulo mas mahigpit ang magiging kampanya kontra Abu Sayyaf kumpara sa mga nakaraang administrasyon.
Kahapon ng umaga dineploy na sa Western Mindanao Command ang 69th infantry batallion na katumbas ng mahigit apat na raang sundalo.
Ngayong araw naman idi-deploy ang second scout ranger battalion sa WESTMINCOM.
(Janice Ingente / UNTV Correspondent)
Tags: ipinag-utos ni Pangulong Duterte, Pagsugpo sa Abu Sayyaf Group
