MANILA, Philippines – Isinusulong ng Philippine National Police (PNP) ang panukalang batas na bubuo ng DNA database system.
Ayon kay PNP Crime Laboratory Director Brigadier General Rolando Hinanay, sa ilalim ng panukalang batas na ito ay isasama na sa booking process ang pagkuha ng dna sample sa mga nahuhuling suspek.
“If we can have a law that would allow us to mandatorily get the dna sample of the arrested suspect, that would greatly help the police in the prosecution of the offences sa court” ani PNP Crime Laboratory Director Brigadier General Rolando Hinanay.
Dagdap pa ni Hinanay na kabilang sa pwedeng kunan ng dna sample ay laway, dugo, buhok, buccal swab, tissue at buto.
Aniya, bukod sa mapapabilis nito ang pagbaba ng hatol sa may sala, makatutulong din ito upang mapawalang-sala naman ang mga napag-alaman lamang na salarin.
May sapat na rin silang kagamitan sa pagkuha ng dna sample at bukod sa Camp Crame, may mga mega lab na rin ang pulisya sa Davao at Cebu.
“Yung ating dna capability ay mas magiging kapaki-pakinabang kung mas maraming laman yung ating database o mas makatutulong sya sa ating administration of justice at mas mapapadali yung investigation sa crime” ani PNP Crime Laboratory Director Brigadier General Rolando Hinanay.
Samantala, tutol naman sa panukalang ito ang Commission on Human Rights (CHR).
Ayon kay CHR Commisioner Gwendolyn Gana, paglabag ito sa right to privacy ng tao. Dapat aniyang may pahintulot ng suspek ang pagkuha ng dna sample nito.
(Lea Ylagan | Untv News)
Tags: Commission on Human Rights, DNA samples, Philippine National Police, PNP Crime Laboratory
METRO MANILA – Wala pa ring napipili si Pangulong Rodrigo Duterte na hahalisi sa naiwang pwesto ni Dating Philippine National Police Chief Retired General Oscar Albayalde.
Ayon sa Pangulo, masusi niyang sinusuri kung sino ang susunod na karapat-dapat na mamuno sa pambansang pulisya.
Posible rin aniya siya na lang ang direktang mangasiwa sa Philippine National Police (PNP) kung wala talaga siyang makikitang katiwa-tiwala at walang bahid ng korupsyon.
“Ang akin, if they have even a single case of corruption, wala na, you’re out. I would rather not appoint anybody for that matter, ako na ang hahawak noon, I will be the one directing the guidance and direction lang naman ako”ani Pangulong Rodrigo Duterte.
Matatandaang sinabi ng Pangulo na mag-iingat siya sa pagpili ng susunod na hepe ng PNP.
Ito ay matapos na malagay sa kontrobersya ang kredibilidad ni Albayalde at iugnay sa operasyon ng mga tinatawag na ninja cop o mga tiwalang pulis, dahilan upang magbitiw ito sa pwesto bilang PNP Chief nang wala sa panahon. Dagdag pa ng Presidente, napakaraming dapat na i-improve sa PNP.
“But verily itong pulis maraming problema, pati generals nila kasali sa droga, yan ang ayaw ko diyan, pati generals, di lumabas yan hanggang di ako naging presidente” ani Pangulong Rodrigo Duterte.
(Rosalie Coz | UNTV News)
Tags: Philippine National Police, PNP Chief, President Duterte
METRO MANILA – Pansamantalang sinususpinde ng Philippine National Police (PNP) ang lahat ng Permit to Carry Firearms outside of residence sa ilang mga rehiyon upang mapanatili ang kapayapaan sa 30th South East ASEAN (SEA) Games.
Ayon kay PNP Office In Charge Lieutenant General Archie Gamboa ipagbabawal mula ang pagdadala ng baril sa Metro Manila, Central Luzon, Calabarzon at La Union. Ito ay epektibo mula November 20 hanggang December 14 ng taong ito.
(Grace Casin | UNTV News)
MANILA, Philippines – Mismong si Pangulong Rodrigo Duterte umano ang may gustong makita ang listahan ng mga pulis na umano’y sangkot sa recycling ng iligal na droga sa bansa.
Handa naman ang mga senador na ibigay ito sa Pangulo, at ipinauubaya na nila sa Punong Ehekutibo ang pagsasapubiko nito.
Ayon kay Senator Bong Go kapag napatunayang sangkot nga sa iligal na droga ang mga pulis na nasa listahan hindi umano magdadalawang isip ang Pangulo na tanggalin sila sa serbisyo at kung magmamatigas ay tiyak na may kalalagyan ang mga ito.
Naaalarma naman si Senate President Vicente Sotto III dahil natuklasan nila na konektato pa rin sa illegal drug transaction sa bilibid ang Agaw Bato Incident na nangyari sa Pampanga noong 2014.
Samantala hindi naman nagustuhan ng ilang senador ang pahayag ng Philippine National Police (PNP) na dapat magdahan dahan ang mga Senador sa paglalabas ng pangalan ng mga pulis na pinaghihinalaang sangkot sa iligal na droga dahil magiging malaking dagok ito sa PNP.
Pero ayon kay Senator Bong Go buo pa rin ang tiwala ng Pangulo kay PNP Chief Director General Oscar Albayalde sa kabila ng isinasangkot ang pangalan nito sa drug recycling.
Sinabi naman ni Senator Ronald “Bato” Dela Rosa na nakahinga na rin ng maluwag si Albayalde ngayong malapit nang maisapubliko ang naturang listahan.
Samantala si Bagiuo City Mayor Benjamin Magalong naman na syang nagbigay ng listahan sa mga Senador, ay nakakatanggap na umano ng banta sa kanyang buhay.
(Grace Casin | UNTV News)
