Muling nagpaalala ang Land Transportation Franchising and Regulatory Board o LTFRB na suspindihin nito ang prangkisa ng sinomang makikiisa sa isasagawang rally ng school service sa araw na ito.
Ayon kay LTFRB Chairman Atty.Winston Ginez sapat na ang ibinigay nilang isang taon upang makapagpalit ng bagong unit ang mga school bus operator.sapat na ang ibinigay nilang isang taon upang makapagpalit ng bagong unit ang mga school bus operator.
“Hinahamon namin sila, na kung sila ay matatapang na lalake ay wag nilang takpan ang kanilang mga plate numbers para ma-monitor namin at kinabukasan ay padadalhan ko na sila ng show cause order.” Pahayag ni LTFRB Chairman Atty. Winston Ginez
Sinigurado rin ni Ginez na hindi magkakaroon ng shortage sa mga school service kahit i-boycott ng mga school bus operator ang unang araw ng klase.
(UNTV GINEZ)
Nagmartsa sa kahabaan ng Commonwealth Avenue kahapon ang libo libong raliyista na tumutuligsa sa administrasyong Duterte. Binubuo ang pagkilos ng iba’t-ibang mga grupo mula sa hanay ng mga manggagawa, magsasaka at iba pang sektor ng lipunan.
Alas tres ng hapon ng makarating sa rally area ang mga ito at agad na sinimulan ang kanilang programa.
Ayon sa mga raliyista, ito ang itinuturing nila na pinakamalaking kilos-protesta kumpara sa nagdaang mga SONA ng Pangulo ng Pilipinas.
Sa halip na makinig sa talumpati ng Pangulo, sinabayan nila ito ng kanilang People’s SONA. Tampok na panauhin dito si dating chief justice na si Maria Lourdes Sereno na tinuligsa ang isinusulong na charter change at federalismo.
Ayon naman kay dating Bayan Representative Neri Colmenares, hindi magandang senyales ang pagka-delay ng SONA ng Pangulo kahapon.
Matapos ang mga talumpati nito, agad na sinunog ang effigy na pinangalanang Dutertrain na simbolo umano ng mga polisiya ng Duterte administration na nagpapahirap sa mga Pilipino.
Sa pagtaya ng Philippine National Police (PNP), umabot sa halos sampung libo ang mga raliyista na dumalo sa pagkilos na itinuturing nilang generally peaceful.
( Mon Jocson / UNTV Correspondent )
Tags: People’s SONA, PNP, rally
Isang kilos protesta ang isinagawa ng Justice for the Morong 43 Alliance sa harapan ng Sandiganbayan kanina.
Panawagan nila na mapabilis ang resolusyon sa mga kasong inihain laban sa mga tauhan ng pulisya at militar na umaresto sa kanila noong February 2010.
Ang Morong 43 ay ang apat na pu’t tatlong health workers na hinuli sa Morong, Rizal sa alegasyong trainee sila sa paggawa ng bomba ng rebeldeng New People’s Army.
Taong 2015 nang alisin ng Ombudsman sa listahan ng mga dapat kasuhan sina dating Pangulong Gloria Macapagal Arroyo, General Delfin Bangit, General Victor Ibrado at dating National Defense Secretary Norberto Gonzales.
Walong sundalo at dalawang pulis lamang ang nakasuhan dahil sa paglabag sa karapatan ng mga inarestong health workers.
Ngunit giit ng grupo, dapat makasuhan si Arroyo at dalawang military officials dahil imposible umanong walang alam ang mga ito.
Sa ngayon ay nakabinbin pa sa Supreme Court ang apela ng grupo.
Ngayong araw sana ang arraignment ng mga opisyal ng Armed Forces of the Philippines na nakasuhan subalit ipinagpaliban ito ng Sandiganbayan sa May 24 dahil sa nakabinbing mga mosyon.
(Mon Jocson)
Tags: Morong 43, rally, Sandiganbayan
Nagsagawa rin ng rally ang ilang kababayan natin sa Cebu kaugnay pa rin ng paggunita sa anibersaryo ng EDSA Uno.
Pasado alas nueve ng umaga nang magsimulang magtipon ang mga miyembro ng Bayan Central Visayas dito sa Cebu City upang magsagawa nga ng kilos protesta.
Isinagawa ang demonstrasyon kasabay ng paggunita sa ika-tatlumpung taon ng EDSA Uno o People Power Revolution.
Kasama rin sa nagsagawa ng protesta ang grupong Piston, Anakpawis at Akbayan.
Layunin ng grupo na tuluyang mawaksi sa bansa ang diktatoryang Marcos at ipanawagan sa pamahalaan na labanan ang korapsyon.
Nais din ng mga ito na matigil ang kahirapan, panggigipit sa mamamayan at pagsikil sa karapatang pantao.
Samantala, may iilang mga pulis na nakaantabay sa lugar upang magbantay at masigurong walang sinomang masasaktan sa isinasagawang demonstrasyon.
(Gladys Toabi / UNTV Correspondent)
Tags: EDSA, mga Cebuano, paggunita, rally
