Laganap na rin ang vape o e-cigarette shops sa bansa at marami na ring Pilipino ang nahuhumaling dito lalo na ang mga kabataan. Nagiging daan din ang vape para sa ilan upang tumigil sa paninigarilyo.
Nguni’t batay sa ulat ng United States Center for Disease Control and Prevention at National Center for Health Research, toxic at carcinogenic o maaaring magdulot ng cancer ang mga kemikal na makikita sa vaporized nicotine cigarettes o vapes.
Sang-ayon din ang Department of Health sa mga pag-aaral sa buong mundo na may nicotine pa rin ang e-cigarettes o vapes.
Ayon kay DOH Undersecretary Eric Domingo, hindi kasama ang vaping sa mga scientifically proven at nirerekomenda ng mga eksperto na paraan upang matigil ang paninigarilyo.
Kaya naman pinag-aaralan na ngayon ng kagawaran ang paglalabas ng regulasyon laban sa e-cigarette kagaya ng nationwide smoking ban o EO No. 26.
Suportado rin ng DOH ang mga panukala sa Kamara para sa regulasyon ng importasyon, distribusyon at pagbebente ng e- cigarettes sa bansa.
Dagdag pa ng DOH, wala ring certification ang e-cigarettes o vapes mula sa Food and Drug Admnistration (FDA) dahil hindi ito nahuhulog sa kategorya ng pagkain o gamot.
( Aiko Miguel / UNTV Correspondent )
Tags: DOH, e-cigarettes, regulasyon
METRO MANILA – Nilinaw ng Department of Health (DOH) na walang naiulat na nasawi dahil sa Monkeypox na tinatawag na ngayong MPOX.
Ayon kay Health Assistant Secretary Albert Domingo, walang pasyenteng nasawi sa MPOX mula sa anomang rehiyon ng bansa .
Nilinaw ito kasunod ng ulat na iniimbestigahan ng DOH sa Central Visayas ang pagkasawi ng isang 27-anyos na lalaki mula sa Negros Oriental, sa pinaghihinalaang kaso ng MPOX.
Paliwanag ni Asec. Domingo, halos magkahawig kasi ang mga butlig o sintomas ng chickenpox, shingles, herpes, at MPIX.
Kaya paalala niya na antayin ang opisyal na pahayag mula sa DOH at iwasan ang paggamit ng hindi beripikadong impormasyon.
METRO MANILA – Umakyat na sa 9 ang bilang ng mga nagpositibo sa sakit na Pertussis sa buong Caraga region mula January 1 hanggang kahapon, June 3.
Ayon sa Department of Health (DOH), mula sa 5 ay naging 9 ang nagpositibo sa rehiyon sa pagpasok ng buwan ng hunyo. 7 rito ay mula sa Surigao Del Norte habang tig-1 naman sa Agusan Del Norte at Agusan Del Sur.
Samantala, nasa 7 naman ang bagong suspected cases na naitala sa rehiyon. Sa ngayon 3 na ang nasawi dahil sa sakit na Pertussis sa Caraga.
Paalala ng kagawaran sa publiko na ang nasabing sakit ay nagsisimula lamang sa mild cough at lagnat na umaabot hanggang 2 Linggo, at pag-ubo naman na umaabot hanggang 6 na Linggo kaya mas maiging magpatingin agad sa doktor kung makaranas ng mga sintomas na ito upang hindi na lumala pa.
METRO MANILA – Binalaan ni House Deputy Majority Leader at dating Department of Health (DOH) Secretary Janette Garin ang publiko laban sa paggamit ng vape.
Kasunod ito ng naitalang kauna-unahang kaso ng pagkamatay sa Pilipinas dahil sa paggamit nito kung saan ang isang 22 anyos na lalaki ang nasawi matapos ang tuloy-tuloy na paggamit ng vape sa loob ng 2 taon.
Sa isang pahayag, sinabi ng mambabatas na kailangan mamulat na ang lahat sa panganib ng paggamit ng naturang device lalo na sa mga kabataan dahil sa masamang epekto nito sa katawan na maaaring mauwi sa kamatayan.
Ikinababahala ni Representative Garin ang mga ulat na nagsasabing may mga kabataang edad 13 anyos ang nahuling gumagamit na ng e-cigarette at vapes kaya muli nitong binigyang-diin na hindi safe na gawing alternatibong paraan ang nasabing kagamitan para maiwasan ang paninigarilyo.
