Mula kay Senador Risa Hontiveros, nasa kostodiya na ngayon ng Senado ang tatlong saksi sa pagpatay kay Kian Lloyd Delos Santos. Ito’y matapos makumpirma ng Senado na mayroon ng authorization letter mula sa magulang ng dalawang menor de edad na saksi.
Kahapon hindi natuloy ang executive session na hiniling ni Hontiveros dahil hinanap ni Senador Panfilo Lacson ang authorization letter. Una nang nagpahayag ng pangangamba si Senador Hontiveros na mayroong mga nagnanais impluwensiyahan ang mga saksi. Ito ay matapos umanong alukin ng Department of Justice ang pamilya ng tatlong witness na sumailalim sa Witness Protection Program.
Giit naman ni DOJ Secretary Vitaliano Aguirre II, may kakayahan sila na mangalaga ng mga minor witnesses. Hinamon naman ni Senate Minority Leader Senator Franklin Drilon si Secretary Aguirre na ipaubaya ang imbestigasyon ng kaso sa Office of the Ombudsman upang maalis ang anumang duda na posibleng hindi maging patas ang imbestigasyon laban sa mga pulis na sangkot dito.
(Mirasol Abogadil / UNTV Correspondent)
Tags: Kian Delos Santos, saksi sa pagpatay, Senado
METRO MANILA – Kinwestyon ng mga senador ang P42-B na inilipat na pondo ng Department of Health (DOH) sa Department of Budget and Management (DBM) – procurement service.
Isa ito sa nakitang deficiencies ng Commission on Audit (COA) sa naging paggamit ng COVID-19 funds noong nakaraang taon dahil sa kawalan ng ilang dokumento.
Ayon sa mga senador, kabilang dito ang anila’y overpriced na pagbili ng face masks at face shield.
Nasa P27 kada piraso ng face mask ang binili habang P120 naman kada piraso ng face shield.
Paliwanag ng DOH, ginawa ang pagbili sa mga ito noong walang pang Suggested Retail Price (SRP) at kinukulang pa ang suplay.
“We were looking at the reasonable price existing at that time. And because of global demands.”ani DOH – Procurement Service Dir. Paul Guimbarda.
Pero giit ng mga senador, napakalayo nito sa SRP na inilabas ng DOH noon ding nakaraang taon.
“DOH released a memorandum providing suggested retail prices for this items. 2-4 pesos per piece of face mask and 26 – 50 pesos per face shield. If you compare this to your statement na bago pa lang nun, ang laki naman po ng diperensya. Ang laki ng overpricing.” ani Senate Minority Leader Sen. Franklin Drilon.
“Sabihin na natin na very tight ang supply at that point, pero saksakan naman yata ng overpriced.”
ani Sen. Imee Marcos.
Nais matanong ng mga senador dating DBM-PS Head Undersecretary Christopher Lloyd Lao.
Pero ayon kay DBM Acting Secretary Tina Rose Canda, nagbitiw na sa pwesto si Lao noong Hunyo.
Nagturuan naman ang DOH at DBM sa delayed at hindi nagastos na special risk allowance at meal, accommodation, transportation allowance para sa mga health worker.
Kabilang sa mga idinaing ng ilang grupo na may mga health care worker ang hindi pa rin nakatanggap ng benepisyo simula pa Setyembre ng nakataang taon.
Ipinagtanggol naman ng ilang Senador ang Commission on Audit matapos ang paglalabas ng sama ng loob ni Duque sa pagdinig sa kamara.
“Kaya hindi dapat tayo nagwawala na winarat sila. Sorry sec. Duque I do not agree with your statement na winarat kayo. Ginawa ng COA ang tungkulin nila at kayo ay may pagkakataon na sumagot at ayusin ung mga kusot na nakita sa inyo.”ani Chairperson, Senate Blue Ribbon Committee Sen. Richard Gordon.
“lahat po tayo dito ay halos wala nang tulog. Hindi ito pa-contest ng kung sinong ahensya ang mas may maraming ginagawa at kung sino ang pinakapagod at nakakaawa. Ito po ay usapin ng pananagutan.”ani Sen. Risa Hontiveros.
Magkakaroon ng susunod na pagdinig ang Senate Blue Ribbon Committee sa August 25.
(Harlene Delgado | UNTV News)
Ipinagpatuloy kanina ng Muntinlupa Regional Trial Court branch 205 ang paglilitis kay Senator Leila de Lima sa hinaharap nitong kaso na may kaugnayan sa illegal drug trade.
Mahigit dalawang taon na rin nakakulong ang Senador at hindi nakakadalo ng sesyon sa Senado. Dahil dito, nito lamang Hulyo, isang resolusyon ang inihain ng dalawang beteranong Senador na sina Senate Minority Leader Franklin Drilon at Senator Panfilo Lacson na payagang makasama sa plenary sesyon ang Senadora sa pamamagitan ng video conference o teleconferencing. Bagay na suportado ni Senate President Vicente Sotto III.
Ayon kay Senator Lacson, may equipment na ang Senado para dito. Ito rin aniya ang ginamit na equipment sa panahon ni dating Senate President Juan Ponce Enrile nang payagang magtele-conference si Senator Antonio Trillanes IV nang makulong ito noon.
Kung ito ay maaaprubahan, maaaring mag-interpellate ang Senadora sa plenaryo at magpanukala ng amiyenda sa mga panukalang batas. Ngunit hindi ito papayagang makaboto dahil base sa rules ng Senate dapat siya ay physically present sa plenaryo.
Ikinatuwa naman ito ng Senadora.
Ayon sa kampo ni Senator de Lima, kakailangan din ang clearance ng PNP para dito.
“Ang rules ng pnp regarding sa mga tao sa custodial ayun nga, bawal ang electronic gadget. So, lahat yan kailangan ng approval ng pnp so iaakyat yan kay Gen. Albayalde,” ani Atty. Raymond Baguilat, abogado ni Sen. de Lima.
Hindi naman naniniwala ang Chairman ng Presidential anti-corruption commission na si Dante Jimenez na pagbibigyan ito ng korte.
“I’m pretty sure the court will denied that,” ayon naman kay Dante Jimenez, Chairman ng Presidential Anti-corruption Commission.
Ang inihaing resolusyon ay pag-aaralan muna ng Senate Committee on Rules bago talakayin at pagbotohan ng mga Senador sa plenaryo.
(Nel Maribojoc | UNTV News)
Tags: Leila De Lima, Senado
METRO MANILA, Philippines – Taong 1916 pa lamang ay may aktibo ng lehislatura ang Pilipinas, binubuo ito ng Senado bilang mataas na kapulungan at ng House of Representatives bilang mababang kapulungan. At sa nagdaang mga panahon, ilang giyera at pangyayari na ang pinagdaanan ng institusyon.
Iba’t ibang mga pulitiko na rin ang nailuklok sa pwesto sa pamamagitan ng isang halalan.
Kung kasaysayan ang pagbabatayan, ano nga ba ang pagkakaiba ng komposisyon ng Senado simula ng maitatag ito hanggang sa panahon natin ngayon?
Noon, mga abogado at kilalang pulitiko o lider ng lipunan ang nauupo sa pwesto sa senado. At ilan dito ay mga naging Pangulo na ng Pilpinas, gaya nina Manuel L. Quezon, Jose P. Laurel, Sergio Osmeña, Manuel Roxas, Elpidio Quirino, Carlos P. Garcia, Ferdinand Marcos, Joseph Estrada, Gloria Arroyo At Benigno Aquino III.
Hindi rin nagpahuli ang mga kababaihan ng maihalal na kaunaunahang babaeng senador ng bansa si Geronima Tomelden-Pecson noong 1947. Pero sa paglipas ng panahon, hindi lamang mga abogado, opisyal ng militar at mga lider ng lipunan ang naluklok sa pwesto.
Taong 1957 pa lamang, naihalal na Senador si Rogelio Dela Rosa, siya ang kauna-unahang artista sa Pilipinas na naging senador ng bansa, isang matinee idol at multi-awarded actor. ‘Di kalaunan nasundan ito ng iba pa gaya ng mag-aamang Joseph, Jinggoy at JV Ejercito, ang mag-amang Ramon at Bong Revilla, Freddie Webb, Tito Sotto at Lito Lapid.
Hindi rin nagpahuli ang alagad ng media gaya ng mga broadcaster na sina Soc Rodrigo, youngest war correspondent at pulitiko na si Benigno “Ninoy” Aquino, Jr., news anchor na sina Loren Legarda at Noli De Castro.
Maging ang mga propesyonal sa ibat ibang larangan ay nasabak na rin sa Senado gaya ng doktor na si Juan Flavier, ang basketbolista na si Robert Jaworski at ang businessman at mag-asawang Manny At Cynthia Villar.
Ngayong 2019 midterm elections, samu’t sari na ang tumatakbo sa pagkasenador at ibang pwesto sa pamahalaan, mula sa larangan ng showbiz, sports mga negosyante at iba pa.
Kamakailan, naging laman ng mga balita ang pahayag ng senatorial candidate na si General Ronald “Bato” Dela Rosa na nais nitong magpaturo sa sistema at proseso ng paggawa ng batas.
Umani ng batikos mula sa publiko ang pahayag na ito ni Dela Rosa subalit marami din naman ang ipinagtanggol ang kandidato.
Inihalimbawa pa ng ilan si dating Pangulong Corazon Aquino na anila’y naluklok sa pinakamataas na pwesto sa bansa mula sa pagiging walang karanasan sa pulitika.
Gumanti naman si Dela Rosa at hinamon ng isang IQ test ang mga tumutuligsa sa kanya.
Sa linggong ito ay posibleng maiproklama na ng Commission on Elections ang labindalawang bagong miyembro ng senado.
At sa lalabas na resulta, ito ang katibayan na mula noon hanggang ngayon, ang mga taong naluklok sa pwesto ay patunay na hindi na maikakahon sa isa lamang propesyon, pagsasanay o pinagmulan ang pagiging isang senador ng Republika ng Pilipinas.
Basta’t makakuha ka ng maraming boto ay tiyak na magkakaroon ka ng pwesto.
(Mon Jocson | UNTV News)
Tags: Senado, senador, Senate of the Philippines
