Nahuli ng mga otoridad sa Cebu ang isang lalaking sinasabing kasabwat ng drug lord na si Rolando “Kerwin” Espinosa Jr.

Nahuli ang suspek na kinilalang si Roderick James Espina limamput-apat na taong gulang sa isang hotel inn sa barangay Lorega Cebu City pasado alas singko kaninang madaling araw

Hindi na pumalag si Espina na tubong Maasin, Southern Leyte nang pasukin ng mga otoridad ang kanyang tinutuluyan matapos makita ng mga pulis na mayroon itong armas.

Nakuha kay Espina ang iba’t ibang sachet ng pinaghihinalaang shabu, baril at mga drug paraphernalia.

Aminado si Espina na gumagamit siya ng droga ngunit itinanggi na nagbebenta siya nito.

Mariin din nitong pinabulaanan na kakilala at mayroon siyang kaugnayan kay Kerwin Espinosa.

Napagalaman na anak ng dating alkalde sa Maasin Leyte na si Edgarino Espina ang nahuling suspek.

Sa ngayon ay patuloy pang inaalam ng mga otoridad kung may iba pang kasamahan si Espina at kung ano ang kaugnayan nito sa mga Espinosa.

(Gladys Toabi/UNTV Radio)

Tags: Kerwin Espinosa