Jampacked ang The Big Dome dahil sa pagdagsa ng fans ni Asia’s Phoenix Morissette sa kanyang kauna-unahang major solo concert kagabi.
Mapabiritan o sayawan, sa bawat performance ay ipinamalas ni Morissette ang kanyang pambihirang husay na nagpapatunay na siya’y isang tunay na Filipino pride. Inabangan din ang live performance ng young diva ng mga awiting nagpasikat sa kanya sa international scene sa pamamagitan ng kanyang WISHclusives.
Highlight din ng event ang duet niya sa isa sa kanyang pinakamalaking music influence, ang Asia’s Songbird, Regine Velasquez.
Samantala, hindi lamang mga kapwa Pilipino ang napahanga ni Morissette kundi maging mga banyaga. Dumayo sa bansa ang ilang YouTube reactors mula pa sa United States at Australia na nakilala siya sa pamamagitan ng kanyang Wish Bus performances para masaksihan ng live ang kanyang concert.
Bukod sa kanyang mga taga-suporta, malaki ang pasasalamat ni Morissette sa Wish 107.5 na producer ng kanyang concert.
Nangako naman ito na muli siyang magbabalik sa Wish Bus para sa kanyang fans.
( Leslie Longboen / UNTV Correspondent )
