METRO MANILA – Tumaas ang bilang ng mga mahihirap na pamilyang Pilipino sa loob ng 3 taon mula 2018 hanggang 2021. 3.5 million o katumbas ng 13.2% ng mga pamilya sa buong bansa ang itinuturing na mahirap.
Batay sa datos na inilabas ng Philippine Statistics Authority (PSA) noong 2021 ay umabot sa 19.99 million na mga Pilipino o 18.1% ang mga mahihirap.
Ibig sabihin nito kulang ang kinikita para tugunan ang pangunahing pangangailangan sa pagkain at iba pang non-food needs tulad ng pang-edukasyon, pangkalusugan, ilaw at tubig at pananamit.
Mas mataas ito kaysa sa 17.67 million o 16.7% na mga mahihirap na Pilipino noong 2018.
Pinakataas ang bilang ng mahihirap o poverty incidence sa Bangsamoro Autonomous Region in Muslim Mindanao (BARMM) na nasa 37.2% ng kabuuang populasyon. At pinakamababa ay dito sa National Capital Region na nasa 3.5%.
Sa 17 rehiyon sa bansa, ang Region 7 o Central Visayas Region ang may pinakamalaking pagtaas ng mga pamilyang mahihirap o poverty incidence sa taong 2021 mula 2018.
Ayon sa National Economic Development Authority (NEDA), malaking epekto sa pagtaas ng bilang ng mga mahihirap na Pilipino at pamilyang Pilipino ang COVID-19 pandemic.
Pero, ayon kay NEDA Secretary Arsenio Balisacan, handa naman silang harapin ang ganitong sitwasyon. Kabilang sa nakitang solusyon ng ahensya ang tuluyang pagbubukas ng ekonomiya. Dagdag pa ni Sec. Balisacan, target ng pamahalaan na gawing moderno ang sektor ng agrikultura o agri business.
Patuloy ding gagawa ng hakbang ang pamahalaan para isulong ang pagne-negosyo at maka-enganyo ng mga mamumuhuhan sa bansa.
Umaasa ang administrasyon na makikipagtulungan ang mga tao, nasa business sector at science community sa mga plano ng gobyerno.
Target ng Marcos administration na mapababa ng 9% ang poverty incidence o bilang ng mga mahihirap na Pilipino sa bansa sa taong 2028.
(Dante Amento | UNTV News)
Tags: Poverty incidence, PSA
METRO MANILA – Bumaba ang bilang ng mga Pilipinong walang trabaho noong nakaraang buwan ng Pebrero ngayong taon.
Batay sa labor force survey ng Philippine Statistics Authority (PSA), mula sa 2.15 million noong January, naitala na lang sa 1.8 million edad 15 pataas ang mga kababayang unemployed .
Ang February 2024 unemployment rate ang pangalawang pinakamababang naitala mula September 2023.
Samantala, tumaas naman sa 96.5% ang employment rate o katumbas ng 48.95 million na mga kababayang may hanapbuhay. Mahigit 3-M mas mataas ito kaysa buwan ng Enero.
Nananatiling ang wage and salary workers ang may pinakamalaking share ng employed persons na may 62.9% ng total employed noong February 2024.
Tags: PSA, Unemployed
METRO MANILA – Sinimulan na ng Philippine Statistics Authority (PSA) ang Philippine Identification System para sa mga batang Pilipino edad 1 hanggang 4 na taon.
Layon ng hakbang na maisama na rin ang mga menor de edad para sa pagpapa-rehistro ng national ID.
Upang maipa-register ang mga batang 1 hanggang 4 na taon, kinakailangan na rehistrado na rin sa PhilSys ang kanilang magulang o guardian.
Ayon sa PSA, ang itatalagang permanent identification number sa mga kabataan ay naka-link sa PhilSys identification number ng kanilang magulang o guardian.
Magdala lamang ng kopya ng PSA birth certificate o iba pang supporting documents upang ma-validate ang demographic information ng batang iparerehistro.
Tags: national ID, PhilSys, PSA
METRO MANILA – Bumilis ang naitalang inflation rate sa bansa para sa buwan ng Pebrero ngayong taon.
Base sa report ng Philippine Statistics Authority (PSA), bumilis sa 3.4% ang inflation rate para sa february 2024.
Mas mataas ito kumpara sa 2.8% na naitala ng Enero ngayong taon.
Ayon sa PSA., ilan sa mga factor na nakapagpabilis sa inflation ay ang mabilis na pagtaas ng presyo ng pagkain, gaya ng gulay, karne at bigas.
Kasama rin sa nakapagpabilis ng inflation ang mataas na transportation cost.
Ito ang unang pagkakataon na muling bumilis ang inflation makalipas ang apat na magkakasunod na buwan ng downward trend.
Ang inflation ay ang pagtaas ng presyo ng bilihin at iba pang pangunahing serbisyo na binabayaran ng mga consumer
Samantala, tiniyak naman ng National Economic Development Authority na pinagiigting na ng pamahalaan ang mga hakbang upang ibsan ang epekto ng el nino sa suplay ng pagkain.
Ayon sa NEDA maaaring makaapekto sa pagtaas ng presyo ng mga pagkain ang banta ng tagtuyot.
