Malubhang nasugatan ang isang lalaki sa Cagayan de Oro City matapos na bumangga ang minamaneho nitong motorsiklo sa isang Toyota Fortuner bandang alas siete kagabi.
Ayon sa driver ng Fortuner, malayo pa ang distansya sa kanya ng motorsiklo ng huli niyang tingnan kaya’t nagleft turn na umano siya patungo sa isang eskinita sa Licuan Drive sa barangay Puntod.
Ngunit nagulat na lamang siya ng biglang banggain ng motorsiklo ang likurang bahagi ng kanyang sasakyan.
Agad namang nilapatan ng pangunang lunas ng UNTV News and Rescue Team ang tinamong mga galos at sugat sa mukha ng biktima at dinala ito sa Northern Mindanao Provincial Hospital.
Makalipas lang ang ilang oras ay isa na namang aksidente ang nangyari sa Lapasan Hi-Way.
Sugatan ang biktima na si Julius Timbla, 38 na taong gulang matapos bumangga ang motorsiklo nito sa isa pang motorsiklo.
Ayon sa biktima papauwi na umano siya nang magkabanggaan ang kasalubong na motorsiklo na mabilis aniya ang takbo.
Nilapatan din ng grupo ang biktima at ngunit tumanggi nang magpadala sa ospital.
(Asher Cadapan / UNTV Correspondent)
BUTUAN, Philippines – Nakahandusay sa kalsada ang isang lalaking motorcycle rider nang datnan ng UNTV News and Rescue team sa South Montilla Boulevard, Butuan City, noong Biyernes ng gabi.
Kinilala ang rider na si Jason Fermano na taga Amayahan, Agusan del Norte.
Nagtamo ito ng sugat sa iba’t-ibang bahagi ng katawan at pananakit balikat bunsod ng pagkakabangga sa center island ng kanyang minamanehong motorsiklo.
Kwento ng mga nakasaksi sa aksidente, mabilis umano ang pagpapatakbo ni Fermano habang binabaybay ang national highway na tila nakikipaghabulan sa ibang motorista.
Nagulat nalang ang mga tao sa lugar nang salpukin nito ang center island.
Matapos lapatan ng first aid ng UNTV Rescue si Fermano ay dinala na ito sa Butuan Medical Center upang masuri ng mga doktor habang kinuha naman ng mga pulis ang motorsiklo nito para sa safe keeping.
Para sa mga mangangailangan ng tulong ng UNTV News and Rescue makipag ugnayan lamang sa numerong 911-UNTV o 911-8688.
(Raymond Octobre | UNTV News)
Tags: aksidente, motorcycle accident, rescue, UNTV News and Rescue Team
May sugat sa leeg at iniinda ang pamamaga ng kanang binti ng bente uno anyos na si Hazel Ann Banaag nang datnan ng UNTV News and Rescue sa Barangay Hall ng Barangay 14, Cagayan de Oro City pasado ala una kaninang madaling araw.
Agad ini-assess ng grupo si Hazel Ann at nilapatan ng pangunang lunas. Matapos nito ay tumanggi na ang biktima na magpadala sa ospital.
Ayon sa biktima, katatapos lamang niyang bumili ng burger kasama ang kaibigan nang bigla syang tinutukan ng patalim sa leeg ng isa sa mga suspek at nagdeklara ng holdap.
Sa takot ng biktima, nagsisigaw ito kaya natawag ang atensyon ng mga nakatambay sa lugar na tumulong sa kanya. Nahuli naman ang tatlong suspek at nakatakas naman ang tatlo pang kasamahan nito dala ang cellphone ng biktima. Balak naman sampahan ng kaso ng biktima ang mga suspek.
Samantala, ilang minuto lang ang lumipas ay nadatnan naman ng grupo sa Carmen Police Station ang dalawang lalaking sugatan sa motorcycle accident sa Vamenta Cor., Mango St., Brgy. Carmen, Cagayan de Oro City.
Kapwa nagtamo ng gasgas sa iba’t-ibang bahagi ng katawan ang motorcycle rider na si Ronald Dapanas 33 anyos at angkas nito na si Charlito Derocho, bente anyos. Matapos malapatan ng first aid ay tumanggi na itong magpadala pa sa ospital.
Ayon sa nakakita sa pangyayari, mabilis umano ang takbo ng mga biktima at nahagip ang likurang bahagi ng nasa unahan nila na motorsiklo.
Tumanggi namang magpagamot ang rider na nabangga ng mga biktima na si Richard Picato, 27 anyos.
Nagkasundo nalang ang dalawang panig na huwag nang magsampa nang kaso.
( Weng Fernandez / UNTV Correspondent )
Tags: biktima ng holdap, Cagayan de Oro City, UNTV NEWS AND RESCUE
Masuwerteng gasgas lang ang tinamo ng mga magkakabarkada matapos maaksidente ang sinasakyan nilang motorsiklo sa Ayala Highway, Barangay Balintawak sa Lipa, Batangas kagabi.
Ayon sa mga biktima, galing silang Batangas City at patungo sana ng Malvar nang biglang lumabas sa isang kanto ng Ayala Highway ang isa pang motorsiklo na tinamaan nila sa likurang bahagi dahilan upang mawalan sila ng kontrol sa manibela.
Agad namang nilapatan ng UNTV News and Rescue Team ang mga gasgas sa tuhod at binti ng mga biktima na sina Romel de Asis, Juan Carlo Maldorado at Tristan Samonte na tumanggi nang magpadala sa ospital.
Samantala, nagkasundo naman ang dalawang panig na magkaayos na lang at hindi na magreklamo sa pulisya.
