Nirespondehan ng UNTV News and Rescue Team ang isang aksidente sa bahagi ng Barangay San Rafael, Tarlac City kagabi.
Ang biktimang si Sonny Torres ay iniinda ang mga sugat sa kamay at paa matapos mahagip ng isang delivery truck ang sinasakyan nilang motorsiklo.
Wala naming tinamong sugat ang kasama ng biktima na nagmamaneho ng motorsiklo.
Ayon kay Torres, pa-uturn na sila sa bahagi ng Felomina Subdivision nang biglang sumalpok sa kanilang likuran ang truck.
Sinabi naman ng driver ng truck na hindi na siya nakapag-preno nang biglang lumiko ang sinusundang motorsiklo.
Matapos lapatan ng paunang lunas ay tumanggi nang magpadala sa ospital ang biktima.
Samantala, sa bahagi naman ng Agdao, Davao City ay isang lalaki ring naaksidente sa motorsiklo ang binigyan ng paunang lunas ng UNTV Rescue.
Kinilala ang biktima na si Roger Manggubat na nagtamo ng sugat sa ulo at tuhod matapos siyang bumangga sa isang multicab.
Ayon sa biktima, papunta siya ng Uyanguren Street nang biglang nag-menor ang sinusundan niyang multi-cab kaya siya sumalpok.
Matapos lapatan ng first aid ang mga sugat ng biktima ay inihatid na siya ng rescue team sa ospital.( Bryan Lacanlale / UNTV News)
