METRO MANILA – Base sa price monitoring ng Department of Agriculture (DA) nasa P20 hanggang P30 ang itinaas ng presyo ng lokal na pulang sibuyas.
Ito ay kung pagkukumparahin ang presyo noong Oktubre at ngayong buwan sa mga pangunahing palengke sa Metro Manila.
Nasa P10-P20 naman ang ibinaba ng lokal na puting sibuyas may kaunting pababa at pagtaas ng imported white depende sa palengke.
Ayon kay Bureau of Plant Industry Director Glen Panganiban, dapat ay nasa P140 hanggang P180 lang ang presyo ng pulang sibuyas at hindi dapat umabot ng P220 per kilo gaya sa ilang palengke ngayon.
Sabi naman ng Samahang Industriya ng Agrikultura (SINAG), mataas ang presyo ng sibuyas sa palengke kung ikukumpara sa wholesale price mula sa cold storages na nasa P80 lamang kada kilo.
Kayat dapat na aniyang umaksyon ang agriculture department at alamin sa mga retailer bakit mataas ang bentahan nila ng sibuyas.
Ayon sa DA, nasa 21,000 metric tons ng sibuyas ang pangangailangan ng bansa sa buwan ng Disyembre.
Tiniyak naman ng opisyal na hindi na aabot sa P700 kada kilo ang presyo nito na nangyari noong nakaraang taon.
(Rey Pelayo | UNTV News)
METRO MANILA – Aalamin ng Department of Agriculture (DA) kung saang kamay na dinadaanan ng sibuyas nagkakaroon ng pagtaas ng presyo.
Base sa impormasyong nakalap ng kagawaran, nasa P120/kl ang pinakamataas na presyo mula sa mga magsasaka.
Pero ngayon ay umaabot sa P200 ang kada kilo sa ilang palengke sa Metro Manila.
Mahigit sa doble ito kumpara sa presyo noong nakaraang taon sa parehong buwan.
Inialam narin ng kagawaran kung may nagko-control sa paglalabas ng supply ng sibuyas para mapanatili ang mataas na presyo nito.
Inirerekomenda din ng sinag ang pag-aangkat ng 7.500 metric tons ng puting sibuyas kung ibabatas sa produksyon noong nakaraang taon.
Pero dapat anilang pagtugmain muna ang aktuwal na imbentaryo para malaman kung gaano karami ang kailangang angkatin.
Ayon sa DA, titiyakin nilang nasa “timing” kung mag-aankat man ng sibuyas ang bansa para hindi na maulit ang krisis na nangyari noong nakaraang taon.
(Rey Pelayo | UNTV News)
METRO MANILA – Tumaas na naman ang presyo ng sibuyas sa merkado.
Umaabot na ngayon sa P160 hanggang P200 ang kada kilo ng sibuyas sa mga palengke sa Metro Manila base sa price monitoring ng Department of Agriculture (DA).
Ayon sa mga magsasaka ng sibuyas, halos tapos na ang anihan at nasa P120 ang huli nilang benta kada kilo.
Pero may dagdag na anila itong P15 kada kilo dahil sa gastos sa renta sa cold storage, upa sa tauhan at nabawasan narin ang timbang.
Base sa datos ng Bureau of Plant Industry, halos 13,000 metriko tonelada ng puting sibuyas ang mayroon sa bansa na tatagal hanggang sa Setyembre.
Ang pulang sibuyas naman ay mahigit pa sa 98,000 metriko tonelada na tatagal naman hanggang Nobyembre.
METRO MANILA – Maaaring itaas sa P3-P4 ang presyo ng bigas sa mga palengke base sa pagtaya ng Samahang Industriya ng Agrikultura (SINAG).
Ipinahayag nI SINAG Chairman Rosenda So, ito’y dahil nasa P1.50 ang itinaas ng presyo ng palay.
Ayon naman sa Department of Agriculture (DA), ang pagtaas ng presyo ng palay ay makabubuti sa mga magsasaka dahil makababawi na ito sa kanilang mga ginastos.
Sa ngayon ay namimili din ng palay ang National Food Authority (NFA) pero nasa P19 lamang ito kada kilo at kailangan ay tuyo na.
Ayon sa DA, ang mga lugar na hindi masyadong pinapasok ng mga trader ang maaaring mapagbilhan ng mga palay para iimbak.
Dagdag pa ng ahensya, sa ngayon ay may sapat naman na supply ng bigas ang bansa lalo na’t maluwag naman ang importasyon nito.
Samantala noong 2022 ay lumampas sa 3 milyon tonelada ng bigas ang inangkat ng bansa.
(Rey Pelayo | UNTV News)
